Տեսանյութեր
01.08.2019 | 13:33Բագրատաշենի մաքսակետում բեռը մաքսազերծելու օրինական պահանջին ընդդիմացած և ինքնավնասման փորձ կատարած քաղաքացու ստեղծած իրավիճակից շատերն օգտվել են և փախցրել իրենց բեռը: Կառավարության նիստից հետո տեղեկությունը լրագրողներին փոխանցեց ՊԵԿ նախագահ Դավիթ Անանայանը:
Դիտարկմանը՝ արդյո՞ք դա շոու է եղել, ՊԵԿ նախագահը պատասխանեց, որ չէր ցանկանա նման որակում տալ, մինչդեռ այդ դեպքին հետևել են այլ իրադարձություններ:
«Այդ գործընթացի ժամանակ, երբ մեր ծառայողները զբաղված են եղել օգնություն ցույց տալով կամ ուշադրությունը շեղվել է, շատ հայրենակիցներ օգտվել են իրավիճակից և բեռները փախցրել են: Կարծում եմ՝ մեկը մյուսի հետ կապ չունի, այդ շոուն չէին կազմակերպել, որ կարողանային բեռներ տանել: Բայց ուզում եմ ուշադրությունը հրավիրել նրան, որ մեր կողքին կան մարդիկ, որոնք օգտվում են իրավիճակից»,- ասաց Անանյանը:
Հիշեցնենք, որ Բագրատաշենի մաքսակետում հուլիսի 29-ին քաղաքացու ինքնավնասման դեպքի առնչությամբ ՊԵԿ լրատվական ծառայությունից հայտնել էին. «Ի պատասխան Բագրատաշենի մաքսակետի աշխատակիցների՝ ՀՀ ներմուծած մոտ 1 տոննա միրգը մաքսազերծելու օրինական պահանջի՝ քաղաքացին փորձել է խուսափել բեռի որոշ մասը ձևակերպելուց՝ ինքնավնասման դիմելու միջոցով: Մաքսային մարմինների աշխատակիցները քաղաքացուն տեղափոխել են Նոյեմբերյանի հիվանդանոց, որտեղ, անհրաժեշտ բուժօգնություն ստանալուց հետո, քաղաքացին վերադարձել է մաքսակետ, ավարտել մաքսային ձևակերպման աշխատանքները, ստացել իր բեռը և հեռացել»,- ասված էր հաղորդագրության մեջ:
Մանրամասները՝ տեսանյութում:
Նարեկ Կիրակոսյան
