Քաղաքականություն
31.07.2019 | 13:34Վերջին տասը ամիսներին Հայկ Մարությանն իր նախընտրական խոստումները չի կատարել, տեղաշարժ չկա. այս մասին այսօր Երևանի քաղաքապետարանի դիմաց անցկացվող ցույցի ընթացքում լրագրողների հետ զրույցում նշեց ՀՅԴ Երևանի քաղաքային կոմիտեի ներկայացուցիչ Արա Ռոստոմյանը։
«Ուզում ենք Երևանի քաղաքապետին հիշեցնել իր տված խոստումները և լրջացման կոչ անել, որպեսզի հետայսու ձեռնամուխ լինի իր ներկայացրած խնդիրների լուծմանը»,- նշեց Ռոստոմյանը։
Նրա խոսքով՝ քաղաքային իշխանություններն ընտրություններից հետո տեսանելի քայլեր չեն կատարել աղբահանության, վերելակների նորոգման, կանաչապատման և մի շարք այլ խնդիրների լուծման ուղղությամբ։
«Այսօր տեսնում ենք, որ Երևանում աղբահանության վիճակն օր օրի վատանում է։ Քաղաքապետարանի կողմից 2 մլրդ դրամ ավել գումար հատկացվեց և համայնքային հիմնարկ ստեղծվեց։ Հիմնարկի բացումից մեկ ամիս է անցել, սակայն ոչ մի փոփոխություն չի նկատվում»,- ասաց Արա Ռոստոմյանը։
ՀՅԴ Երևանի քաղաքային կոմիտեի ներկայացուցիչն ընդգծեց, որ փոփոխություններ չկան նաև վերելակների նորոգման հարցում։ Նրա խոսքով՝ բյուջեից 71%-ով կրճատվել է վերելակների նորոգմանը հատկացվող գումարը։
«Ներկայացվում էր, որ այլ միջոցներով պետք է փոխվեն վերելակները։ Եթե վերելակի փոխման մեկ օրինակ կա, ապա սպասենք մնացածին։ Քաղաքային իշխանությանն այսօր կրկին դեղին քարտ ենք ցույց տալիս։ Կարմիր քարտն արդեն հրաժարականի պահանջով կլինի»,- եզրափակեց Արա Ռոստոմյանը։
Մանրամասները՝ տեսանյութում:
Նելլի Մելքոնյան
