06.10.2026 | 11:27
Ռուսական զորքերը հարվածել են Զապորոժիեում Դնեպր գետի վրայով անցնող կամուրջներից մեկին․ 5 մարդ տուժել է
ԱԺ-ն հրաժարվել է Ռուբեն Հայրապետյանի «Նոյ»-ից. կես տարվա համար «Ապարան ջուր» ՍՊԸ-ին վճարվելու է 1 մլն 128 հազար դրամ
Տնտեսություն
30.07.2019 | 21:26
Ազգային ժողովի աշխատակազմի ջրի մատակարարը մոտ մեկ ամիս է փոխվել է: Խորհրդարանն օգտվում է «Ապարան ջուր» ընկերության արտադրանքից: Մինչ այս, Ազգային ժողովն օգտագործում էր «ՌՌՌ» հանքային ջրերի գործարան ՓԲԸ-ի «Նոյ» ապրանքանիշի ջուրը:
Ջրի մատակարարման համար հուլիսից մինչև դեկտեմբեր Ազգային ժողովը վճարելու է 1 մլն 128 հազար դրամ։ Ընդհանուր խորհրդարանում տեղադրվել է 30 հատ ջրի նոր դիսպանսեր:
Իրավաբանական անձանց պետական ռեգիստրի տվյալների համաձայն՝ «Ապարան ջուր» ՍՊԸ-ն պատկանում է Վահրամ Դավթյանին: Այն գտնվում է Արագածոտնի մարզի Ապարան քաղաքում: Ազգային ժողովին, սակայն, խմելու ջուրը մատակարարել է «Մեհրաբ Մեհրաբյան» Ա/Ձ-ն: «Ապարան ջուր» ՍՊԸ-ի վաճառքի կենտրոնից Factor.am-ին փոխանցեցին, որ ընկերությունն ունի ֆինանսական խնդիրներ, ինչի պատճառով էլ առայժմ միայն ջրի արտադրությամբ են զբաղվում՝ չկարողանալով առաքել:
Նշենք, որ Ազգային ժողովի ջրի նախկին մատակարար «ՌՌՌ» հանքային ջրերի գործարանը պատկանում է Ֆուտբոլի ֆեդերացիայի նախկին նախագահ Ռուբեն Հայրապետյանին: Factor.am-ն Ազգային ժողովի աշխատակազմի ղեկավար Տիգրան Գալստյանից հետաքրքրվեց, թե ինչու են հրաժարվել «Նոյ»-ից և արդյոք դա որևէ կապ կարո՞ղ է ունենալ գործարանի սեփականատիրոջ՝ Ռուբեն Հայրապետյանի անձի հետ։
«Մրցույթով ով հաղթել է, նրա հետ էլ պայմանագիրը կնքվել է: Տարեկան պայմանագիր է, լրանում է, նոր բյուջեով նոր մրցույթ է հայտարարվում: Սեփականատերը կապ չունի, ով էժան արժեք առաջարկի՝ նրան էլ ընտրում ենք, ես իրենց որակական տարբերությունները չեմ զգում»,- ասաց ԱԺ աշխատակազմի ղեկավարը:
Նարեկ Կիրակոսյան
