Հասարակություն
25.07.2019 | 21:00
Շիրակի մարզի Գյումրի քաղաքում կստեղծվի հայ- չինական համատեղ լաբորատորիա:
Այս մասին այսօր հրավիրված մամուլի ասուլիսի ժամանակ ասաց Գիտության կոմիտեի նախագահ Սամվել Հարությունյանը՝ նշելով, որ դա կարվի Գյումրիի երկրաֆիզիկայի և ինժեներային սեյսմաբանության ինստիտուտի բազայի հիման վրա:
Նա նաև անդրադարձավ կոմիտեի կողմից ռազմական ոլորտում ֆինանսավորած ծրագրերին՝ նշելով, որ դրանց թիվը հասնում է ավելի քան 30-ի:
«Կարծում եմ, որ առաջիկա մեկ, երկու տարում հետաքրքրիր զարգացումներ կլինեն ռազմական ոլորտում՝ կապված մեր մասնագետների հաջողությունների հետ: Այսինքն՝ նոր զինատեսակներ և այլն: Մեր կողմից ֆինանսավորված ծրագրերը տարբեր ոլորտներին են վերաբերում՝ ֆիզիկատեխնիկական, քիմիակինեսաբանական խնդիրների լուծում, նորագույն տեխնոլոգիական լուծումներ և այլն: Ունենք լուրջ հաջողություններ, ստեղծված են համակարգեր, որոնք հետաքրքրություն են ներկայացնում ոչ միայն մեր բանակի համար, այլև զարգացած ռազմական ենթակառուցվածքներ ունեցող երկրներն են հետաքրքրված դրանցով: Հույս ունենք, որ մոտ ապագայում որոշ զինատեսակներ, որոշ տեխնիկա, որոնք մեր կողմից են ստեղծվել, հնարավոր է ՆԱՏՕ-ի երկրները մեզնից գնեն»,- ասաց Հարությունյանը:
