Ռուսաստանից հատուկ եկել էին Նիկոլ Փաշինյանի հետ լուսանկարվելու համար․ գյումրեցիներին այդպես էլ չհաջողվեց հանդիպել վարչապետին

Գյումրիում այսօր մեկնարկել է «Իմ քայլը հանուն Շիրակի մարզի» բիզնես համաժողովը, որին մասնակցում է նաև ՀՀ վարչապետ Նիկոլ Փաշինյանը։

Առավոտից բազմաթիվ գյումրեցիներ հավաքվել էին Գյումրու տեխնոլոգիական կենտրոնի բակում` վարչապետին տեսնելու ու նրան հանդիպելու ակնկալիքով։ Մինչ վարչապետը շրջում էր էքսպո-ցուցադրության տաղավարներով, որտեղ ներկայացված էին Շիրակի մարզի արտադրանքներն ու ծառայությունները, գյումրեցիները անհույս ճիգեր էին գործադրում արգելապատնեշներն անցնելու ու Նիկոլ Փաշինյանին տեսնելու համար։

Մասնավորապես, Factor.am-ի հետ զրույցում ռուսաստանաբնակ Ջուլիետա Բագասյանը նշեց, որ վաղ առավոտից եկել, սպասում է, որ վարչապետին տեսնի ու լուսանկարվի նրա հետ։ Այսօր մեկնում է ՌԴ, նույնիսկ ավիատոմսն է ցույց տվել, որ ներս թողնեն, բայց ապարդյուն։

«Եկել եմ Ռուսաստանի Դաշնությունից հատուկ պարոն Փաշինյանին տեսնելու, լուսանկարվելու համար։ Երևանում հրապարակում եմ փորձել տեսնել, կառավարության շենքի մոտ 3 օր անընդհատ գնացել եմ, չկարողացա նրան տեսնել։ Եկել եմ այստեղ տեսնեմ, այն էլ էլի չի հաջողվում, այսօր գնալու եմ ու, ավաղ, երազանքս չի կատարվելու։ Ես Նիկոլ Փաշինյանին շատ եմ սիրում, Յարոսլավում ամեն ելույթները նայում եմ, իր հետ եմ, ժողովրդի հետ եմ։ Ոչինչ չեմ ուզում, ուղղակի ուզում եմ իմանա, որ իրեն բոլորը սիրում են»,- ասաց Ջուլիետա Բագասյանը։

Իսկ, երբ արդեն բավական ուշացումով Շիրակ էքսպոն բացվեց հանրության համար, գյումրեցիները սկսեցին «պաշարել» Գյումրու տեխնոլոգիական կենտրոնի մուտքը Նիկոլ Փաշինյանին տեսնելու համար։ Նրանք իրենց բողոքներն էին հայտնում, նամակները հանձնում վարչապետի անվտանգությունն ապահովող աշխատակիցներին։ Ներկաներից մեկն էլ հատուկ պաստառով էր եկել՝ «Շիրակ աշխարհը ողջունում է մեր վարչապետ Նիկոլին», « Ջաջուռցի Սահակը Նիկոլի հետ է մինչև վերջ»  գրառումներով։

Էմմա Չոբանյան