17.12.2025 | 11:33
Տեր Շտեգենը վերադարձել է խաղադաշտ ու մասնակցել «Բարսելոնայի» հաղթանակին․ ՏԵՍԱՆՅՈՒԹ
ՌԴ-ում ողբերգական ավտովթարից զոհված հայ երիտասարդ ընտանիքը Շիրակի մարզից է՝ Լեռնակերտ համայնքից
18.07.2019 | 14:55
Ռուսաստանի Դաշնության Կրասնոդարի մարզում հուլիսի 16-ի լույս 17-ի գիշերը տեղի ունեցած ողբերգական ավտովթարի հետևանքով մահացել են հայեր, նույն ընտանիքի անդամները՝ 32-ամյա վարորդը, 28-ամյա կինը, նրանց 4 և 6 տարեկան դուստրերը։
Ռուսական լրատվամիջոցների տեղեկությունների համաձայն՝ «Ֆորդ տրանզիտ» մեքենան ընթացել է Ջուբգա գյուղից Գելենջիկի ուղղությամբ, երթուղու 1453 կմ-ում վարորդը կորցրել է կառավարումը, ճանապարհից դուրս եկել և բախվել ծառին։ Վթարից ստացած վնասվածքներից էլ ուղևորները մահացել են։
Ավտովթարի հետևանքով մահացածները Շիրակի մարզի Լեռնակերտ համայնքի բնակիչներն են՝ 32-ամյա Միշա Մկրտչյանը, նրա կինն ու երեխաները։
« Գիշերվա կեսին իմացել ենք, առանձնապես ականատես էլ չի եղել, որ մանրամասներ իմանայինք, վթարից հետո նոր մարդիկ իմացել են»,- Factor.am-ի հետ զրույցում նշեց Լեռնակերտ համայնքի ղեկավար Մովսես Մովսիսյանը։
Համայնքապետը հայտնեց, որ Միշա Մկրտչյանը աշխատում էր Ռուսաստնում, կինն ու երեխաներն էլ մի քանի օր առաջ էին գնացել՝ միասին հանգստանալու։
«Իրենք ընտանիքով այնտեղ չէին ապրում, Միշան այնտեղ աշխատում էր, մի քանի օր առաջ էլ կնոջ ու երեխաներին կանչել էր իր մոտ հանգստանալու։ Իր համար փոքր բիզնես էր ստեղծել, գնում -գալիս էր, մի 5 ամիս էլ գյուղում չէր եղել։ Ամառվա սեզոնին ցանկացել էր իր կնոջն ու երեխաներին տանել, մի երկու օր առաջ էլ դեպքից իր ծննդյան օրն էր։ Ուզեցել էր իր ընտանիքի հետ նշել»,-ասաց Լեռնակերտի համայնքապետը։
Մեր զրուցակցի խոսքով՝ գյուղը շատ մեծ կորուստ ունեցավ, քանի որ շատ լավ մարդիկ էին, լավ ընտանիք։ Վթարի արդյունքում զոհվածների մարմինները մինչեւ երեկո կտեղափոխվեն Հայաստան։
Էմմա Չոբանյան
