13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Լիճքի հիմնական դպրոցը փլուզման եզրին է. 100 աշակերտ սովորում է անմխիթար պայմաններում
Հասարակություն
14.07.2019 | 16:16
Գեղարքունիքի մարզի Լիճք համայնքը, որը մարզկենտրոնից գտնվում է 35 կմ հեռավորության վրա, վերաբնակեցվել է 1932 թվականին Արևմտյան Հայաստանի Բագրևանդ Գավառի Ալաշկերտի տարածաշրջանից գաղթածներով:
Մի քանի տարի անց 1936-37 թվականներին համայնքում կառուցվել է առաջին դպրոցը: Համայնքի ղեկավար Գնել Գրիգորյանի տեղեկացմամբ՝ ժամանակին ամբողջ տարածաշրջանի երեխաները, սկսած Երանոս գյուղից՝ վերջացրած Վերին Գետաշեն համայնքով, ուսում են առել հենց այդ դպրոցում: Այսօր, սակայն, այս հիմնական դպրոցը գտնվում է վթարային վիճակում:
«Դպրոցի պատերը փայտից և սոլոմից են կառուցված: Ընթացքում` Սովետական միության ժամանակ, վերանորոգվել է: Իսկ հիմա վտանգավոր է, սեյսմակայուն չէ: Բայց ստիպված յոլլա ենք տանում: Գնահատված չէ, թե դպրոցը որ աստիճանի վթարային է, փաստաթղթային ոչինչ չունենք»,- ասում է համայնքի ղեկավարն ու նշում, որ խնդրի մասին պատկան մարմինները տեղյակ են վաղուց, սակայն որևէ քայլ չեն ձեռնարկում. «Ես բազմիցս եմ դիմել նախկին կառավարությանը, որպեսզի նոր դպրոց կառուցեն: Խոստանում էին՝ այսօր, վաղը, և այդպես էլ չկառուցվեց: Հիմա էլ չգիտենք, թե ինչ է լինելու այդ դպրոցի ճակատագիրը: Նոր կառավարությանն էլ ենք դիմել, տեղյակ են, բայց չգիտենք, ինչ կլինի»:
Համայնքի մոտ 5600 բնակիչներից 1000-ը դպրոցահասակ երեխաներ են: Նրանցից 100-ը սովորում են հենց այս հիմնական դպրոցում՝ տագնապի մշտական զգացողությամբ։ 1970-ական թվականներին գյուղում կառուցվել է նաև երկրորդ՝ միջնակարգ դպրոցը: Այս դպրոցում, որը գործում է համեմատաբար ավելի լավ պայմաններում, կրթվում են 900 աշակերտներ: Գյուղապետի խոսքով՝ այս դպրոցում կարող է սովորել մինչև 1400 աշակերտ, սակայն չեն գալիս: Վերը նշված 100 աշակերտների ծնողները նախընտրում են իրենց երեխաներին տանել ոչ բարվոք հիմնական դպրոց։ Պատճառն այն է, որ դպրոցները գտնվում են միմյանցից մոտ 2 կմ հեռավորության վրա։ Իսկ թե ի՞նչ ճակատագիր է սպասվում փլուզման վտանգի առաջ կանգնած դպրոցին, հայտնի չէ:
«Չեմ ուզում, որ այդ դպրոցը փակվի, սիրտս ցավում է, ես էլ եմ այդտեղ սովորել: Հետո էլ փակողը ես չեմ: Բացի այդ, եթե փակվի, կարելի է ասել, այն կփլվի: Վերանորոգել հնարավոր չէ, ամբողջությամբ նորը պետք է կառուցվի»,- եզրափակեց Գնել Գրիգորյանը:
Տաթևիկ Ղազարյան
