03.08.2026 | 23:30
Տաթև-Լծեն ավտոճանապարհին բեռնատարը դուրս է եկել երթևեկելի հատվածից և բախվել հողաթմբին
Աղբը լավագույն դեպքում 3-4 օրը մեկ են տանում, իսկ այն հաճախ վարակի ու թունավորման պատճառ է դառնում․ մասնագետներրը՝ Երևանի աղբահանության մասին
Հասարակություն
08.07.2019 | 17:30
2011 թվականի օգոստոսին ԱԺ արտահերթ նիստում ընդունված աղբահանության մասին օրենքով սպառողը միայն պարտավորություններ ունի և ոչ մի իրավունք։ Այս մասին այսօր հրավիրված մամուլի ասուլիսի ընթացքում նշեց «Սպառողների խորհրդատվության կենտրոն» ՀԿ-ի նախագահ Կարեն Չիլինգարյանը։
«Ստացվում է՝ պարտավոր ես վճարել աղբահանության համար, անկախ նրանից, թե ինչ ծառայություն ես ստացել կամ ընդհանրապես չես ստացել։ Տարիներ շարունակ ոչինչ չի փոխվել, միայն վճարն է 100-ից 200 դրամ դարձել»,- նշեց Կարեն Չիլինգարյանը։
Նրա խոսքով՝ իշխանափոխությունից հետո էլ նույն դրությունն է․ օրերով աղբահանություն չի իրականացվում։
«Հատկապես շոգ օրերին հակասանիտարական վիճակ է ստեղծում, ինչը բացասական հետևանքներ կարող է թողնել։ Հույսեր ունենք, բայց մինչև հիմա դրանք չեն իրականացել: Գոնե քաղաքապետարանից պարբերաբար տեղեկացնեին, որ աշխատանքեր են տարվում»,- ընդգծեց «Սպառողների խորհրդատվության կենտրոն» ՀԿ-ի նախագահը։
Ըստ նրա՝ Կառավարության 2002 թվականի որոշմամբ՝ մինչև 5 ջերմաստիճանի դեպքում աղբահանությունը պետք է երեք օրը մեկ իրականացվի, իսկ 5-ից բարձր դեպքում՝ ամեն օր։
«Մեզ մոտ լավագույն դեպքում 3-4 օրը մեկ է աղբահանություն իրականացվում։ Պատահում է՝ երկու շաբաթ կամ տասը օր չի իրականացվում։ Սա Կառավարության որոշման խախտում է»,- նշեց Կարեն Չիլինգարյանը։
Թերապևտ Լամարա Մանուկյանի կարծիքով էլ վատ աղբահանության թիրախային առաջին օղակը շնչառական ուղիների ալերգիկ հիվանդություններ ունեցող մարդիկ են։
«Ցանկացած շենքի կողքով անցնելիս աղբի հոտ ես զգում։ Բացի այդ, երեխաները, որոնք շենքի մոտակայքում խաղում են, շնչում են օդը, աղբի հետ շփում ունենում, երբ, օրինակ, գնդակն աղբի մեջ է ընկնում։ Տուն գնալիս, հաճախ, ձեռքերը լավ չեն լվանում և դա հիվանդությունների ու թունավորման պատճառ է դառնում»,- ընդգծեց Լամարա Մանուկյանը։
Մասնագետների կարծիքով՝ թե՛ քաղաքապետարանը, թե՛ «Սանիթեք»-ը պետք է հարցին հետամուտ լինեն, հակառակ դեպքում՝ խնդիրն անհետևանք չի մնա։
Նելլի Մելքոնյան
