Վրաստանում հաշվարկել են ռուսաստանցի զբոսաշրջիկների թվի նվազման հետևանքով տնտեսության վնասի չափը

Ռուսաստանի իշխանությունների՝ ՌԴ-ից Վրաստան չվերթների ժամանակավոր արգելքով պայմանավորված՝ 2019 թվականին Վրաստանում  հանգստացող ռուսների թիվը մեկ միլիոնով կնվազի, ինչը Վրաստանի տնտեսությանը 2 մլրդ  լարիի (շուրջ 710 մլն դոլար) վնաս կպատճառի։

Նման գնահատական է տվել Զբոսաշրջության ազգային վարչության  ղեկավար Մարիամ Կվրիվիշվիլին․ հայտնում է ՏԱՍՍ գործակալությունը։

«2018 թվականին Ռուսաստանից  Վրաստան 1,4 մլն զբոսաշրջիկ է  այցելել։ Նույն տարում ռուսական կողմից Վրաստանի զբոսաշրջության ոլորտ ստացված եկամուտը 2 մլրդ լարի է կազմել։ Մենք սպասում էինք, որ 2019 թվականին  1,7 զբոսաշրջիկ կժամանի, իսկ եկամուտը 2,5 մլրդ լարի կկազմի (ավելի քան 886 մլն)։ Այսպես, մեր կանխատեսումներով, մինչև տարեվերջ ՌԴ-ից զբոսաշրջիկների թիվը շուրջ 1 մլն կկազմի»,- նշել է Կվրիվիշվիլին։

Նրա խոսքով՝ փորձելու են Ռուսաստանից զբոսաշրջիկների հոսքի կրճատման հետևանքով տնտեսական վնասի չափը նվազագույնի հասցնել և զբոսաշրջային նոր շուկաներ փնտրել, այդ թվում՝ ԱՄՆ-ում և Եվրոպայում։ Այդ նպատակով զբոսաշրջային վարչությունն արևմտյան հեռուստաընկերություններոմ արդեն Վրաստանի մասին գովազդային հոլովակներ է ներկայացրել։

Ավելի վաղ՝ հունիսի 21-ին, ՌԴ նախագահ Վլադիմիր Պուտինը հրաման է ստորագրել, ըստ որի հուլիսի 8-ից ժամանակավորապես կդադարացվեն Ռուսաստանից Վրաստան՝ ռուսական ավիաուղիների կողմից իրականացվող օդային փոխադրումները (այդ թվում՝ առևտրային)։  Հունիսի 22-ին էլ ՌԴ Տրանսպորտի նախարարությունը հայտարարել է, որ հուլիսի 8-ից Ռուասատանի տարածքում կդադարեցվեն վրացական ավիաուղիների իրականացրած չվերթները։

Վրաստանի Զբոսաշրջության ազգային վարչության տվյալներով՝ մայիսին Վրաստան 172 հազար ռուս է ժամանել, ինչի հետևանքով այդ ամիս ռուսները Վրաստան այցելած զբոսաշրջիկների շարքում առաջին տեղում են հայտնվել։

Նելլի Մելքոնյան