23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Նախատեսվում է 2021 թվականը դիմավորել առանց «աղետի գոտու շահառու» հասկացության․ Վահագն Վերմիշյան
Տնտեսություն
01.07.2019 | 18:14
Հայաստանի Հանրապետությունը նախատեսում է 2021 թվականը դիմավորել առանց «աղետի գոտու շահառու» հասկացության: Այս մասին այսօր իր պաշտոնավարման 100 օրն ամփոփոխ ասուլիսի ժամանակ ասաց ՀՀ քաղաքաշինության պետական կոմիտեի նախագահ Վահագն Վերմիշյանը՝ նշելով․ «2008-2017 թթ․բնակարանով ապահովվել է 4839 ընտանիք, և պետական բյուջեից դրա համար ծախսվել է մոտ 65 միլիարդ դրամ: 2018 թվականին բյուջեից հատկացվել է 460 միլիոն դրամ, և ապահովվել է բնակարանով 44 ընտանիք: 2019 թվականի բյուջեով նախատեսված է 560 միլիոն դրամ 60 ընտանիքի համար»։
Քաղաքաշինության պետական կոմիտեի նախագահի խոսքով՝ ևս 3 միլիարդ դրամ էլ կհատկացվի 2020 թվականին՝ 453 ընտանիքի բնակարանով ապահովելու համար և արդյունքում 2021 թվականին կվերանա «աղետի գոտու շահառու» հասկացությունը։
Խոսելով Հայաստանում շինարարության տեմպերի աճի մասին՝ Վահագն Վերմիշյանը նշեց, որ առաջիկա տարիներին Հայաստանում շինարարության բում կսկսվի և ծավալուն շինարարությունն է մեծ դերակատարություն ունենալու տնտեսական հեղափոխության հարցում։
«Մասնավոր բիզնեսն արդեն հետաքրքրություն է դրսևորում ու պատրաստ է աջակցել արդյունաբերական ձեռնարկությունների, բնակարանների ու գյուղատնտեսական օբյեկտների կառուցման խոշոր նախագծերին։ Հայաստանը քաղաքաշինության հարցում լրջորեն հետ է մնացել քաղաքակիրթ աշխարհից։ Պետք է մի շարք բարեփոխումներ անցկացնել, որոնք թռիչքային զարգացման կհանգեցնեն»,- ասաց Վերմիշյանը։
«Մենք անցյալի սխալները կրկնելու իրավունք չունենք։ Պետք է վերանայել «Քաղաքաշինության մասին» օրենքը, իսկ ավելի ճիշտ` Քաղաքաշինական օրենսգիրք մշակել, որպեսզի այդ ոլորտը կոմիտեի ղեկավարի ճաշակից ու նախասիրություններից կախված չլինի»,- ասաց նա՝ շեշտելով, որ շինարարության ոլորտում մեծ ներուժ կա, որն այժմ ամբողջովին չի օգտագործվում։
