10.10.2026 | 19:47
Քննարկվել են Հայաստանում կախվածությունների կանխարգելման և բուժման ուղղությամբ իրականացվող աշխատանքները
Սարգսյան-Ալիև հանդիպման հարցը չի հստակեցվում
12.09.2017 | 12:16
Այսօր՝ սեպտեմբերի 12-ին, Նյու Յորքում մեկնարկում է ՄԱԿ-ի Գլխավոր Ասամբլեայի հերթական նստաշրջանը, որի ընթացքում սպասվում է Հայաստանի և Ադրբեջանի արտաքին գործերի նախարարների հանդիպումը։ Նալբանդյան-Մամեդյարով հանդիպման մասին հայտնել են երկու կողմից էլ՝ նկատելով, որ արդեն իսկ ձեռք է բերվել պայմանավորվածություն։ «ԵԱՀԿ ՄԽ համանախագահների կողմից հանդիպման առաջարկություն է արվել և նախարարների կողմից ձեռք բերվել համաձայնություն»,- Factor.am-ի հետ զրույցում ավելի վաղ ասել էր ՀՀ ԱԳՆ մամուլի քարտուղար Տիգրան Բալայանը։
ՀՀ նախագահ Սերժ Սարգսյանի մամուլի քարտուղար Վլադիմիր Հակոբյանին գրավոր հարցմամբ խնդրել էինք տեղեկացնել, թե հնարավո՞ր է ՄԱԿ-ի Գլխավոր Ասամբլեայի շրջանակում լինի Սարգսյան-Ալիև հանդիպում, ինչին ստացել ենք ոչ հստակ պատասխան:
«ՀՀ նախագահի այցելությունների և հանդիպումների մասին հանրությունը տեղեկացվում է պատշաճ կարգով և ժամանակին»,- ասված է հարցման պատասխանում։
Հիշեցնենք, որ Սարգսյան-Ալիև հնարավոր հանդիպման ՄԱԿ-ի Գլխավոր Ասամբելայի շրջանակում խոսել է ԵԱՀԿ ՄԽ ամերիկացի նախկին համանախագահ Ռիչարդ Հոգլանդը՝ լրատվամիջոցների հետ զրույցում հայտարարելով, որ հարկավոր է կազմակերպել Հայաստանի և Ադրբեջանի նախագահների հանդիպումը։ ՌԴ ԱԳՆ ներկայացուցիչ Մարիա Զախարովան էլ ասել էր, թե Նալբանդյան-Մամեդյարով հանդիպումից հետո կարվի հայտարարություն՝ նախագահների մակարադակով հանդիպման մասին։
