14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Անհետաձգելի անհրաժեշտություն է դարձել ֆինանսավորվող բոլոր ծրագրերի մոնիթորինգի իրականացումը. ԱլԳ ՔՀՖ Հայաստանի ազգային պլատֆորմը՝ ՀՀ-ում ԵՄ դրամաշնորհների չարաշահման առնչությամբ
Հասարակություն
10.05.2017 | 17:15
ԱլԳ ՔՀՖ Հայաստանի ազգային պլատֆորմը հայտարարություն է տարածել ՀՀ-ում ԵՄ-ի կողմից ֆինանսավորվող ծրագրերի շրջանակներում կոռուպցիայի և խարդախության փաստերի առնչությամբ: Հայտարարության մեջ, մասնավորապես, ասված է.
«Մենք ողջունում ենք Հայաստանում ԵՄ պատվիրակության քայլերն` ուղղված օրինախախտումների և հանցագործությունների բացահայտմանը:
Միջազգային կազմակերպությունները և, մասնավորապես, Եվրոպական միությունը` որպես Հայաստանին ամենամեծ ֆինանսական օժանդակությունը ցուցաբերող կառույց, անգնահատելի աջակցություն են ցուցաբերում երկրում ամենատարբեր ոլորտներում բարեփոխումների իրականացմանը: Դրանց արդյունավետ և հետևողական իրականացմանն են նպաստում նաև քաղաքացիական հասարակության կազմակերպությունները։
Ցավոք, հատկացված միջոցների նկատմամբ անբարեխիղճ և անպատասխանատու վերաբերմունքի դեպքերը ստվեր են գցում ինչպես ՔՀԿ-ների, այնպես էլ Եվրոպական միության կողմից այդ ուղղությամբ կատարվող հսկայական աշխատանքի վրա: Հայաստանի Հանրապետության և Եվրամիության միջև հարաբերությունների խորացմամբ ոչ շահագրգիռ որոշակի շրջանակներ օգտվում են նման դեպքերից` հայաստանյան քաղաքացիական հասարակությանը, Եվրամիությանը և ԵՄ-Հայաստան համագործակցությունը վարկաբեկելու նպատակով։
Որպես ոչ կառավարական կազմակերպությունների միավորում, որի համար ՀՀ-ԵՄ համագործակցությունն անվերապահ առաջնահերթություն է, ԱլԳ ՔՀՖ Հայաստանի ազգային պլատֆորմը վճռականորեն կողմ է օրինախախտումների կոնկրետ դեպքերի լիարժեք հետաքննությանը, արդար և անկողմնակալ դատավարությանը և մեղավորների հանդեպ իրավական համարժեք միջոցների կիրառմանը:
Միևնույն ժամանակ կարծում ենք, որ Եվրոպական միությունը պետք է ավելի հետևողական լինի պետական և հասարակական ինստիտուտներին տրամադրվող միջոցների արդյունավետ ծախսման, պոտենցիալ շահառուների նախորդ գործունեության ու նրանց արժեքային համակարգի ուսումնասիրության հարցերում։
Մասնավորապես, մենք համոզված ենք, որ անհետաձգելի անհրաժեշտություն է դարձել ֆինանսավորվող բոլոր ծրագրերի մոնիթորինգի իրականացումը անկախ և կոմպետենտ հասարակական կազմակերպությունների կողմից:
Մեծ ուշադրություն պետք է դարձվի դրամաշնորհային մրցույթների անցկացման ու դրամաշնորհառուների կողմից կազմակերպվող միջոցառումների թափանցիկությանը: Այդօրինակ մրցույթներում հաղթողներին որոշելիս, մեր կարծիքով, անհրաժեշտ է կարևորել հայտատու կազմակերպությունների «կենսագրությունը», նախկինում ծավալած գործունեության մեջ իրենց առաքելության հանդեպ դրսևորած հավատարմությունը: Այս ամենը հաշվի չառնելը նվազեցնում է իրականացվող ծրագրերի օգտակար գործողության գործակիցը, դանդաղեցնում քաղաքացիական հասարակության` որպես բարեփոխումների իրականացման շարժիչի ջանքերը և, ինչպես ցույց է տալիս ներկայումս ընթացող հետաքննությունը, հղի է կոռուպցիոն ռիսկերով:
Իր հերթին, ՔՀՖ Հայաստանի ազգային պլատֆորմը պարտավորվում է ինքնաքննադատաբար գնահատել իր դերը Հայաստանի քաղաքացիական հասարակության շրջանում առողջ մթնոլորտի ձևավորման հարցում։
Մենք պատրաստ ենք առավելագույն ջանքեր գործադրել` թույլ չտալու Պլատֆորմի անդամ կազմակերպությունների կողմից անբարեխիղճ և անպատասխանատու վերաբերմունքի դրսևորումներ։ Մենք բաց ենք այս բոլոր ուղղություններով համագործակցության համար և պատրաստ ենք մեր ներդրումն ունենալ Եվրամիության կողմից հատկացված միջոցների չարաշահումների պատճառ հանդիսացող խնդիրների հետագա վերլուծության և վերացման գործում»:
