Հասարակություն
21.05.2019 | 20:29«Երբ տեղափոխվեցի հինգերորդ դասարան, հնարավորություն ստացա մասնակցել մաթեմատիկայի օլիմպիադային: Այդքան էլ վստահ չէի, որ առաջին անգամ մասնակցելով հաջողություններ կունենամ, առաջին կարգի դիպլոմ կստանամ, բայց իմ հույսերն արդարացվեցին և հիմա ձեռքումս իմ չարչարանքն եմ պահում»,- նշում է Վրեժ Ղազարյանը:
Ապագա ծրագրավորող Վրեժը մաթեմատիկային օրական 3-4 ժամ է տրամադրում: Օլիմպիադայի ամենակրտսեր մասնակիցներից է, մյուսներն արդեն ավագ դպրոցում են սովորում: Ասում է՝ նախարարից մրցանակ ստանալը շատ է ոգևորել: Կրթության նախարարը նույնպես այս առիթով ոգևորված էր:
«Ինձ համար մեծ պատիվ է՝ Հայաստանում տարբեր առարկաներից լավագույն ցուցանիշներ ունեցող աշակերտներին պարգևներ հանձնել, որովհետև այսուհետ ՀՀ-ում ում առաջնային է լինելու կրթությունը և գիտելիքը: Հարգանք ու պատիվ են ունենալու բոլոր նրանք, ովքեր այս ուղղությամբ ունեն հաջողություն»,- ընդգծում է Արայիկ Հարությունյանը:
Հանրապետական օլիմպիադային 16 առարկա է ներկայացված, գերակշռողը մաթեմատիկան է: Այս տարի, նախորդ տարվա համեմատ, մասնակցության ավելի մեծ ցուցանիշ է գրանցվել. մասնակցել է 1568 դպրոցական՝ նախորդ տարվա 1535-ի համեմատ: Վերջին փուլում ընդամենը 72 դպրոցական է առաջին կարգի դիպլոմի արժանացել: Մասնակիցների գերակշիռ մասը մայրաքաղաքից է:
Արայիկ Հարությունյանը վստահ է, որ պարգևատրված երեխաներն առաջիկայում ավելի մեծ հաջողություններ կգրանցեն:
Նելլի Մելքոնյան
