Կոնդի խնդիրը՝ «հայոց հարց»․ բողոքի ակցիա քաղաքապետարանի դիմաց. ՏԵՍԱՆՅՈՒԹ

Երևանի քաղաքապետարանի դիմաց բողոքի ակցիա իրականացնող Կոնդ թաղամասի բնակիչները պահանջում են վերանայել սեփականաշնորհման գործընթացում կայացված որոշումները՝ տարածքների թերի չափագրումների մասով։

Բնակիչներից Նաիրա Երեմյանը Factor.am-ի հետ զրույցում ասում է, որ նախկինում ներքին որոշում է եղել թերի չափագրել իրենց պատկանող տարածքները․ «Քանի որ Կոնդում բոլորիս տան պատերի լայնությունը 1-ից 1․5 մետր է, ուրեմն՝ 20 քառակուսի մետր բնակմակերեսից են սխալ չափագրել, 75 քառակուսի՝ հողատարածքից։ Պակաս չափագրված տարածքները շատերի մոտ շտրիխներով է նշված, որ, իբր թե, օգտագործում են, նկուղները չկան, երկրորդ հարկը չկա։ Իմ մտահոգությունն այն է, որ շատ հնարավոր է՝ հետո կառուցապատողներ ի հայտ գան, հետո իրենք պայմանագիր կնքելիս նայեն փաստաթղթում առկա տվյալները, բայց մենք ուզում ենք իրական չափերով»։

Տիկին Նաիրան արդեն հոգնել է քաղաքային իշխանությունների առջև խնդիրը բարձրացնելուց: «Մեր Կոնդի խնդիրը դարձել է հայոց հարց։ Իշխանությունները գալիս գնում են, մեր հարցը ոնց կա, նույն ձև մնում է»,- ասաց տիկին Նաիրան։

Կոնդեցիներից Սիլվա Շահինյանը նշում է, որ ժամանակին գումարներ են պահանջել ճշգրիտ չափագրումներ անելու համար, սակայն իրենք չեն ունեցել գումար, ինչի պատճառով սեփականության փաստաթղթերում պահպանվել են սխալ չափագրումները։ Կոնդեցիների խոսքով՝ 2011 թվականից մինչ օրս դիմում-խնդրանքներ են ուղարկում քաղաքապետարան՝ նոր և ճշգրիտ չափագրումներ իրականացնելու համար, բայց՝ անարդյունք։

Մանրամասները՝ տեսանյութում:

Ռոբերտ Անանյան