Արամ Ա կաթողիկոսը հանդիպել է Սիրիայի նախագահ Բաշար Ասադի հետ

Մեծի Տանն Կիլիկիո Արամ Ա կաթողիկոսը Դամասկոսում հանդիպել է Սիրիայի նախագահ Բաշար Ասադի հետ: Այս մասին տեղեկանում ենք Կիլիկիո կաթողիկոսության մամլո դիվանից:

Ավելի քան մեկ ժամ տևած հանդիպման ընթացքում անդրադարձ է եղել Սիրիայում տիրող իրավիճակին և հայ համայնքին առնչվող հարցերի ու ծրագրերի: Արամ Ա-ն շնորհակալություն է հայտնել Սիրիայի նախագահին՝ Հալեպի Սրբոց Քառասնից Մանկանց մայր եկեղեցու վերականգնման նպատակով ցուցաբերած աջակցության համար:

Հիշեցնելով, որ Հայոց ցեղասպանությունից հետո Սիրիայի ժողովուրդը, անկախ կրոնական պատկանելությունից, ջերմորեն հյուրընկալել է հայ ժողովրդին, Վեհափառը հաստատել է, որ հայ համայնքը վճռական մասնակցություն կունենա այդ երկրի վերականգնման աշխատանքներին: Նա նաև երախտագիտոություն է հայտնել Սիրիային և սիրիացի ժողովրդին՝ հայ դատի հարցում ցուցաբերած զորակցության համար:

Բաշար Ասադն իր հերթին բարձր է գնահատել սիրիահայությանը՝ նշելով, որ նրանք Սիրիայի իրավահավասար քաղաքացիներն են՝ միևնույն պարտավորություններով ու իրավունքներով:

Սիրիայի նախագահն ընդգծել է, որ հայերը միշտ վստահելի, սիրված և աշխատասեր քաղաքացիներ են եղել և իրենց դրական մասնակցությունն են ունեցել Սիրիայի առաջընթացի գործում: Հանգամանքների բերումով երկրից հեռացած սիրիահայերին Բաշար Ասադը կոչ է արել վերադառնալ, վերականգնել իրենց տներն ու աշխատավայրերը՝ վստահեցնելով, որ Սիրիայի հայ համայնքը կշարունակի վայելել պետության զորակցությունը։