Աշխատող ուսանողների ուսման վարձը եկամտային հարկով կփոխհատուցվի․ նախագծի հեղինակներ

Ազգային ժողովի «Իմ քայլը» խմբակցության ղեկավար Լիլիթ Մակունցն ու նույն խմբակցության պատգամավոր Սիսակ Գաբրիելյանը շրջանառության մեջ են դրել օրենքի նախագիծ, որով առաջարկվում է աշխատող ուսանողների ուսման վարձը եկամտային հարկով փոխհատուցել:

Այսօր հրավիրված մամուլի ասուլիսի ժամանակ խմբակցության ղեկավար Լիլիթ Մակունցը նշեց, որ այս նախաձեռնության նպատակն է աջակցել ուսանողներին՝ տալով նրանց հնարավորություն կրթությանը զուգահեռ նաև աշխատել։

«Այս նախագծի նպատակը միայն հարկային մուտքեր ապահովելը չէ, մեր գերնպատակը ուսանող-բուհ-աշխատաշուկա կապը ստեղծելն է։ Մենք այս փուլում նպատակ ունենք ուսանողներին տալ հնարավորություն, որ ուսանողը սեփական աշխատանքով կարողանա վճարել իր ուսման վճարը»,- ասաց  Մակունցը։

Վերջինիս խոսքով՝ այս նախաձեռնությունը կարող է նաև լուծել կրթական ծրագրերի և աշխատաշուկայի պահանջների անհամապատասխանության խնդիրը. «Շատ հաճախ բախվում ենք մի իրավիճակի, երբ բուհը գերազանց ավարտած ուսանողը պրակտիկ գիտելիքների չի տիրապետում, իսկ այս խնդրի կարգավորման համար, կարծում ենք, որ բուհերը կթարմացնեն և կփոխեն իրենց ծրագրերը՝ այն հնարավորինս  հարմարեցնելով աշխատաշուկայի չափանիշներին»։

Ասուլիսին ներկա  «Իմ քայլը» խմբակցության պատգամավոր Սիսակ Գաբրիելյանն էլ նախագծի վերաբերյալ նշեց, որ այս նախագիծը հեղափոխական լուծում է և աշխատող մարդուն տալիս է հնարավորություն օգտվելու այս արտոնությունից։

«Համալսարաններում նշում են, որ սա միանշանակ դրական ազդեցություն կունենա, քանի որ այն կբերի նրան, որ հնարավորինս շատ ուսանողներ կլինեն, ինչի պարագայում նաև կավելանա դասախոսների աշխատավարձը»,- նշեց պատգամավորը։

Ըստ պատգամավորի՝ եթե սա տարածվի բակալավրիատի վրա, հաճախելիության և կրթության որակի առումով գուցե խնդիր ունենանք:

«Ուսանողների հետ ենք հանդիպել, շահառուներն իրենք են և շահագրգիռ են, որ դա հենց առաջին կուրսից լինի, բայց պետք է լսենք նաև փորձագետների կարծիքը»,-ասաց Գաբրիելյանը:

Վերջինս նաև հավելեց, որ այս նախաձեռնությունը կտարածվի պետական և մասնավոր այն բուհերի վրա, որոնք ունեն պետական հավատարմագիր։

Հիշեցնենք, որ թեմային ավելի վաղ անդրադարձել էր Factor.am-ը՝ «Իմ քայլը» խոստանում է բարձրագույն կրթությունը դարձնել փաստացի անվճար. ի՞նչ ռիսկեր է պարունակում այս նախաձեռնությունը»  վերտառությամբ նյութում։

Աղավնի Սուքիասյան