09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
8 տարում Կենդանաբանական այգուց 80 աշխատակից է հեռացվել. այգու նախկին աշխատակիցները բողոքում են. ՏԵՍԱՆՅՈՒԹ
Հասարակություն
01.05.2019 | 18:46
Կենդանաբանական այգու նախկին աշխատակիցները հերթական բողոքի ակցիան են իրականացնում՝ անփոփոխ պահանջով․ այգու տնօրեն Ռուբեն Խաչատրյանը պետք է հրաժարական տա։
«Ես չեմ հասկանում՝ քաղաքապետարանն ինչ է մտածում, որ պահում է նման կառավարիչ, որն ընդհանրապես կապ չունի կենդանաբանական այգու և բնության հետ։ Չլինելով մասնագետ, նա մինչև անգամ մասնագետների հետ չի կարողանում լեզու գտնել և համագործակցել»,- նշում է Կենդանաբանական այգու նախկին աշխատակից Մանուկ Մանուկյանը։
Այգու տնօրեն Ռուբեն Խաչատրյանն այս ամենի վերաբերյալ սեփական պատկերացում ունի․ «Կենդանաբանական այգու ներսում տեղի ունեցող իրականությունը ոչ մի կապ չունի այն անձանց ներկայացրած իրականության հետ, որոնք այս պահին այնտեղ բողոքում են»։
Այգու նախկին անասնաբույժ Անուշ Ռաֆայելյանի խոսքով՝ Երևանի քաղաքապետարան պահանջներ ու առաջարկներ են ներկայացրել, որոնք անտեսվել են։ Այգում ստուգման աշխատանքներ են իրականացվել, աշխատանքային խումբ է ստեղծվել, սակայն արդյունք դեռ չկա։
«Աշխատանքային խումբը ձևավորվել է անցյալ տարվա նոյեմբեր ամսին։ Հայկ Մարությանն անձամբ եկավ ծանոթանալու և ներկայացնելու աշխատանքային խմբի խնդիրները՝ ակնկալելով հարյուր տոկոսանոց երկարատև աշխատանք։ Խմբում ընդամենը եղել է երկու նիստ ու դա եղել է դեկտեմբեր ամսին։ Դրանից հետո այդ խմբի աշխատանքը պաշտոնապես դադարեցվել է»,- ընդգծում է Կենդանաբանական այգու նախկին անասնաբույժ Անուշ Ռաֆայելյանը։
Նախկին աշխատակիցների պնդմամբ՝ Ռուբեն Խաչատրյանը քաղաքապետարանի հետ գաղտնի պայմանավորվածության մեջ է, դրա համար էլ այնտեղից չեն արձագանքում։
«Ես չեմ կարծում, որ իշխանափոխության դեպքում, նոր քաղաքային իշխանության օրոք հնարավոր է որևէ թաքուն պայմանավորվածություն ձեռք բերել կամ համոզել։ Դա ուղղակի ծիծաղելի է»,- տարակուսում է Ռուբեն Խաչատրյանը։
Ռուբեն Խաչատրյանի հասցեին բողոքի ակցիայի ընթացքում միանգամից մի քանի մեղադրանք հնչեց։ Դրանցից մեկը տարիներ առաջ տեղի ունեցած դեպքն է, որի հետևանքով այգում երեք առյուծ է քնեցվել ու այդ մասին տևական ժամանակ ոչ ոք չի իմացել։
Ռուբեն Խաչատրյանն, այնուամենայնիվ, պնդում է, որ դեպքի հետ կապված ոչինչ գաղտնի չի պահվել։
«Ոչ մի բան գաղտնի չի եղել։ Նախկին քաղաքային իշխանությունները տեղյակ են եղել։ Քնեցումը ձևաչափ է, որը կիրառվում է կենդանաբանական այգիների կողմից․ դա էֆթանազիան է, որը բարեկեցության մի մաս է»,- նշում է այգու տնօրենը։
Աշխատակիցների խոսքով՝ Ռուբեն Խաչատրյանը 2011 թվականից, այգու տնօրենի պաշտոնում աշխատանքի անցնելուց ի վեր, մոտ 80 աշխատակցի է հեռացրել, բացի այդ՝ ցուցաբերել է ոչ դրական վերաբերմունք ու այդպես շարունակում է առ այսօր։
«Մաքսիմում թիվը, որ կարող է փոփոխված լինել՝ իրենք հեռացած լինեն կամ ես հեռացրած լինեմ, ոչ ավելի, քան 10 հոգի է՝ 8 տարվա ընթացքում»,- ասում է Ռուբեն Խաչատրյանը։
Կենդանաբանական այգու տնօրենի պաշտոնից Ռուբեն Խաչատրյանը հեռանալ, կարծես թե, չի պատրաստվում։
«Ես կարծում եմ՝ տնօրենի պաշտոնն այն պաշտոնը չէ, որ 10 կամ 20 հոգի բողոքավորների պատճառով պետք է հրաժարվել կամ պայքար մղել»,- նշում է Ռուբեն Խաչատրյանը։
Նա նաև հավելում է, որ իր հրաժարականը պահանջող նախկին աշխատակիցների հետ միայն դատական հարթության վրա կզրուցի․ անձնական շփման եզրեր, իր խոսքով, չկան։
Ի դեպ, բողոքի ակցիայի մասնակիցները պահանջում էին նաև հանդիպում քաղաքապետ Հայկ Մարությանի հետ։ Նրանց խոսքով՝ ամեն տարի մայիսի 1-ին՝ այգու սեզոնային բացմանը, քաղաքապետը ներկա է գտնվում, բայց այս տարի բացառություն էր։ Քաղաքապետարանի մամուլի խոսնակ Հակոբ Կարապետյանը Factor․am-ի հետ զրույցում հայտնեց, որ Հայկ Մարությանը, հնարավոր է այսօր կենդանաբանական այգի գնա․ հստակ տեղեկություն չունեն։
Նելլի Մելքոնյան
