Քաղաքականություն
17.04.2019 | 19:10Մեկ տարի առաջ ապրիլի 17-ին խորհրդարանը Սերժ Սարգսյանին ընտրեց վարչապետ։ Ուղիղ մեկ շաբաթ հետո նա հրաժարական տվեց վարչապետի պաշտոնից՝ «Մերժիր Սերժին» շարժման շնորհիվ։ Հեղափոխության մեկ տարվա ամփոփման առիթով Factor TV-ն զրուցում է Հայաստանի Եվրոպական կուսակցության համանախագահ Տիգրան Խզմալյանի հետ:
– Ձեզ բավարարու՞մ է նոր Հայաստանը։
– Ես կասեի մաթեմատիկական բանաձևով այն, ինչ կատարվեց, անհրաժեշտ էր, բայց ոչ բավարար: Ուստի՝ դա ինձ չի բավարարում, այլապես ես կզբաղվեի իմ սիրած գործով՝ կնկարեի ֆիլմեր, կգրեի գրքեր:
– Ինչ եք կարծում, հեղափոխությունը մտե՞լ է ժողովրդական մտածողություն, թե՞ դեռ հեռու ենք դրանից:
– Դա ամենակարևոր հարցն է: Հեղափոխություն կամ ռևոլյուցիա լատինական բառը, ինչո՞ւ լատինական, որովհետև այն շատ նման է էվոլյուցիա լատինական բառին, էվոլյուցիան այն է, ինչ տեսնում ենք մեծ հեռավորության վրա, ընդհանուր պլանի: Իսկ եթե խոշորացնենք պլանը, մոտիկից նայենք, կտեսնենք, որ ցանկացած էվոլյուցիա բաղկացած է փոքրիկ ռևոլյուցիաներից: Այսինքն՝ ամեն ինչ կախված է խոշորությունից: Մենք ապրում ենք շատ փոքր երկրում, թվով էլ քիչ ենք, ամեն ինչ տեսնում ենք խոշորացված: Հեղափոխությունը դեռ տեղի չի ունեցել, որովհետև չի փոխվել տնտեսական, քաղաքական, գաղափարական համակարգը, չի փոխվել արտաքին քաղաքականությունը: Այո՛, փոփոխություններ կան, կա փոփոխությունների ցանկությունը: Հեղափոխությունը նոր է սկսվում։
– Տնտեսական համակարգում ի՞նչը Ձեզ չի բավարարում:
– Հայաստանի տնտեսության առյուծի բաժինը պատկանում է օտար պետության, նրա պետական մոնոպոլիաներին, կորպորացիաներին:
– Նկատի ունեք Ռուսաստանը…
– Այո՛: Ամենացածր կենցաղային մակարդակով նայենք: Եթե ցանկացած պետություն իր բյուջեն լցնում է մեր՝ քաղաքացիների կոմունալ վճարներով, ապա ցանկացած հայ ընտանիք, վճարելով կոմունալ ծախսերը, վճարում է Ռուսաստանին՝ գազի, հեռախոսի, բջջային կապի, էլեկտրականության համար: Այն առասպելը, թե Ռուսաստանն է մեզ պահում, ծիծաղելի է: Մենք ենք հիմա գաղութի պես վճարում շատ ավելի մեծ գումարներ Ռուսաստանին, քան այն, ինչ ստանում էինք մեր խեղճուկրակ տրանսֆերտների միջոցով:
– Ինչպե՞ս եք գնահատում ԱԱԾ գործունեությունը։
– Դա ինձ համար մեծ և ցավագին հարց է: Ես այն քիչ մարդկանցից եմ, որոնք համարում են, որ այսօր Հայաստանին Անվտանգության ծառայությունը հակացուցված է, որովհետև խզել իր խորը արմատները, իր կապերը Ռուսաստանի հետ գրեթե անհնար է: Գոնե ժամանակավոր պետք է լուծարել ԱԱԾ-ն, և նրա գործառույթները բաժանել բանակի, որը պետք է զբաղվի արտաքին հետախուզությամբ, և ոստիկանության միջև, որը զբաղվելու է երկրի ներսում հետախուզությամբ:
Հարցազրույցն ամբողջությամբ՝ տեսանյութում:
Մհեր Արշակյան
