Հայկակ Արշամյանը հերքում է․ «Հայաստան» համահայկական հիմնադրամի աշխատանքը կաթվածահար չի եղել

«Հայաստան» համահայկական հիմնադրամի տնօրեն Հայկակ Արշամյանը վստահեցնում է՝ իր ղեկավարած հիմնադրամը շարունակում է իր բնականոն աշխատանքը, ավելին՝ մշակել են նոր ռազմավարություն, որը կներկայացվի հիմնադրամի հոգաբարձուների խորհրդին, իսկ կատարվող նվիրատվությունների հետ կապված էլ որևէ խնդիր չունեն։

«Այն տեղեկությունները, թե հիմնադրամի աշխատանքների հետ կապված կան խնդիրներ, հերքում եմ, ավելին՝ հիմնադրամն այս տարի իրականացնելու է հեռուստամարաթոն, ունի նոր ռազմավարության նախագիծ, նոր ծրագրեր, որոնք կներկայացնենք այս տարվա հունիսին հոգաբարձուների խորհրդին։ Այնպես որ, եթե համարում են, որ 16 մլն դոլարի նվիրատվության խոստում ունեինք, որի 80-90 տոկոսն արդեն իրականություն է դարձել ու դրանով մեր աշխատանքները կարելի է կազմալուծված համարել, ապա թող համարեն»,- ասաց նա:

Հիշեցնենք, որ այսօր «Ժամանակ» թերթը գրել էր, որ «Հայաստան» համահայկական հիմնադրամի ամենամյա հեռուստամարաթոնը այս տարի կարող է ընդհանրապես չանցկացվել, իսկ հիմնադրամի աշխատանքները կաթվածահար են եղել:

Հարցին՝ ապատեղեկատվությո՞ւն է արդյոք, որ հիմնադրամի ամենամեծ լոսանջելեսյան գրասենյակի աշխատանքները, ըստ էության, կաթվածահար են եղել, քանի որ գրասենյակի մի շարք առանցքային աշխատողներ աշխատանքից ազատման դիմումներ են գրել, Արշամյանը պատասխանեց․ «Հիմնադրամի լոսանջելեսյան գրասենյակն անկախ, ոչ կառավարչական կազմակերպություն է, գործում է իր կանոնադրությամբ և ԱՄՆ-ի օրենքներով, և ընդամենը մեզ հետ համագործակցող կազմակերպություն է․ դա, որպես այդպիսին, մեր գրասենյակը չէ»։

Անդրադառնալով տարածված տեղեկությանը, որ իշխանություններն իրենց ուշադրությունը Հայաստան հիմնադրամից սևեռել են Աննա Հակոբյանի «Իմ քայլը» և «Ժպիտների քաղաք» հիմնադրամների վրա, Հայկակ Արշամյանը նշեց․«Դա չեմ մեկնաբանում, կեղծ լուրեր և ապատեղեկատվություն է»։

Աղավնի Սուքիասյան