Քրեական աստիճանակարգության բարձրագույն կարգավիճակ ունեցող անձ չեք, որ այդ տոնով եք խոսում․ Մանասյանը՝ Մանուկյանին․ ՏԵՍԱՆՅՈՒԹ

ԱԺ պատգամավոր Մեսրոպ Մանուկյանն ու Մարդու իրավունքների պաշտպան Անահիտ Մանասյանը վիճել են ԱԺ հանձնաժողովների նիստում՝ Քրեակատարողական հիմնարկներ համատեղ այցելելու առաջարկի և ՄԻՊ-ի հետ հանդիպում կազմակերպելու շուրջ։

Մանուկյանը նշել է, որ շուրջ մեկ ամիս է՝ փորձում է հանդիպում կազմակերպել Մանասյանի հետ, սակայն իր դիմումներին ի պատասխան՝ տեղեկացվում է, որ պաշտպանը գործուղման է։ Պատգամավորը պահանջել է հստակեցնել՝ առաջիկա 10-20 օրում երբ կարող են համատեղ այցելել «Երևան» և «Նուբարաշեն» քրեակատարողական հիմնարկներ՝ այնտեղ առկա խնդիրներին և պահման պայմաններին ծանոթանալու համար։

Նա նաև քննադատել է ՄԻՊ գրասենյակի՝ Պուշկինի փողոցի շենքում տեղակայված լինելը՝ առաջարկելով այն տեղափոխել Նոր Նորքի 9-րդ զանգված՝ որպես ավելի հարմար վայր։

Ի պատասխան՝ Անահիտ Մանասյանը դժգոհություն է հայտնել պատգամավորի խոսելաոճից՝ այն որակելով քրեական ենթամշակույթին բնորոշ։ Նա ընդգծել է, որ գործուղումների նպատակն այլ տարածաշրջաններում մարդու իրավունքների պաշտպանության զարգացումներին և համապատասխան հաստատությունների գործունեությանը ծանոթանալն է։

Մանասյանը նաև հայտարարել է, որ Մանուկյանի օգնականը, իր օգնականի հետ զրույցը ձայնագրելով՝ առանց նախապես տեղեկացնելու, հնարավոր է՝ խախտել է անձնական տվյալների և մասնավոր կյանքի անձեռնմխելիության իրավունքի հետ կապված չափանիշները։

Ինչ վերաբերում է ՔԿՀ-ներ համատեղ այցին՝ ՄԻՊ-ը նշել է, որ իր հաստատության այցերը պետք է համապատասխանեն անկախության չափանիշներին, և դրանց իրականացման եղանակն ինքն է որոշում։ Նա նաև պարզաբանել է, որ ՄԱԿ-ի չափանիշներով՝ ՄԻՊ հաստատությունը պետք է գտնվի քաղաքի կենտրոնում՝ հանրային տրանսպորտի կանգառներին մոտ, ուստի Նոր Նորք տեղափոխվելու առաջարկն ընդունելի չէ։

Քննարկմանը միջամտել է նաև ԱԺ պատգամավոր Լիլիթ Գալստյանը՝ նշելով, որ ՄԻՊ-ի և պատգամավորների համատեղ այցը ՔԿՀ-ներ չպետք է խոչընդոտի հաստատության անկախությանը։ Նա հիշեցրել է քրեակատարողական հիմնարկներում առկա ծանր վիճակի մասին՝ նշելով, որ նախորդ տարի արձանագրվել է 28 մահ, որից 10-ը՝ ինքնասպանության դեպք։

Մանասյանն իր հերթին ընդգծել է, որ ՔԿՀ-ներում առկա խնդիրներն արդեն մանրամասն ներկայացված են ՄԻՊ տարեկան զեկույցներում, իսկ դրանց լուծման պատասխանատվությունը պետական իշխանություն ունեցող պատգամավորներինն է։

Մանրամասները` տեսանյութում։

Նարեկ Կիրակոսյան