08.08.2026 | 11:56
Ինչպես են գետնին պառկեցնում ու ձերբակալում Հովիկ Աբրահամյանի որդուն. ՔԿ-ն կադրեր է հրապարակել
Վանաձորի թիվ 20 դպրոցում կրքերը հանդարտվել են, դասերը՝ վերականգնվել
Հասարակություն
12.04.2019 | 16:02
Մի քանի օր շարունակ Վանաձորի Պաբլո Տիչինայի անվան թիվ 20 հիմնական դպրոցի աշակերտները դասադուլ էին անում՝ պահանջելով փոխվարչապետի առաջարկով տնօրեն նշանակված Կարինե Մարգարյանի հրաժարականը: Նրանք ցանկանում էին, որ տնօրեն նշանակվի նույն դպրոցի փոխտնօրեն Մարիետա Հարությունյանը:
Factor.am-ի հետ զրույցում Լոռու մարզպետարանի կրթության, մշակույթի և սպորտի վարչության պետի ժամանակավոր պաշտոնակատար Ռաֆայել Հարությունյանն ասաց, որ իրենց կողմից Կարինե Մարգարյանին պաշտոնապես ներկայացնելուց հետո դասադուլն ավարտվել է, դպրոցում դասերն ընթանում են բնականոն հունով. «Դպրոցում դասապրոցեսը վերականգնված է, երեկ գեղեցիկ միջոցառում էին կազմակերպել: Ես էլ եմ ներկա եղել, ուսուցչական ու ծնողական կոլեկտիվն էլ: Դպրոցում հանգիստ է, մարդիկ աշխատում են: Այս պահին ոչ մեկի կողմից ոչ մի դժգոհություն չկա: Այնպիսի մոտեցում չկա, որ ինչ-որ մեկը մտածի, թե մեկը հաղթել է կամ մյուսը պարտվել: Մեր գերխնդիրը եղել է, որ դասապրոցեսը չխաթարվի, և երեխաները նորմալ մասնակցեն դասերին»:
Հարցին՝ արդյոք պարզեցին, թե ովքեր էին այն երիտասարդները, որոնք աշակերտներին դասասենյակներից հանելով հրահրում էին դասադուլ կազմակերպել, Հարությունյանը պատասխանեց. «Ճիշտն ասած՝ ես դրանով չեմ հետաքրքրվել, ինձ համար կարևորը եղել է դասն ու դասապրոցեսը: Այս պահին ամեն ինչ նորմալ է, երեխաները հաճախում են դպրոց»:
Տաթևիկ Ղազարյան
