18.12.2025 | 23:24
ՀՀ տարածքում ավտոճանապարհները հիմնականում անցանելի են
Հռոմի Պապը ծնկաչոք համբուրել է Հարավային Սուդանի առաջնորդների ոտքերը՝ նրանց խաղաղության կոչ անելով
Քաղաքականություն
12.04.2019 | 11:37
Վատիկանում Հարավային Սուդանի առաջնորդների հետ պատմական հանդիպումից հետո Հռոմի Ֆրանցիսկոս Պապը ծնկի է իջել և համբուրել Հարավային Սուդանի առաջնորդների ոտքերը՝ նրանց կոչ անելով վերջ տալ քաղաքացիական պատերազմին: Այս մասին գրում է info24.ru-ն:
Ֆրանցիսկոս Պապը նախագահ Սալվա Կիիրին, նրա նախկին տեղակալ, ապստամբների առաջնորդ Ռիեկ Մաշար Թենիին և մյուս երեք փոխնախագահներին խնդրել է հետևել հրադադարին, որպեսզի հնարավոր լինի արդեն հաջորդ ամիս միասնության կառավարություն ձևավորել:
Աղբյուրի փոխանցմամբ՝ հակամարտող առաջնորդները կորցրել են խոսելու ունակությունը, երբ 82-ամյա կաթոլիկ քահանայապետը դժվարությամբ ծնկի է իջել և համբուրել իրենց ոտքերը:
«Խնդրում եմ ապրել խաղաղության մեջ՝ որպես եղբայրներ: Խնդրում եմ ամբողջ սրտով, եկեք առաջ շարժվենք: Բազմաթիվ խնդիրներ կլինեն, եկեք հաղթահարենք դժվարությունները»,- ասել է Հռոմի Պապը:
Հարավային Սուդանի առաջնորդների և Հռոմի Պապի հանդիպումը տեղի է ունեցել Վատիկանի նախաձեռնությամբ: Հարավային Սուդանի բնակիչները մտավախություն ունեն, որ հարևան Սուդանում ռազմական հեղաշրջումը կարող է խաթարել երկրում հաստատված փխրուն խաղաղությունը: Այդ պատճառով Հռոմի Պապը քաղաքական գործիչներին 24-ժամյա համատեղ աղոթքի ու քարոզի է հրավիրել:
Նշենք, որ Հարավային Սուդանում քաղաքացիական պատերազմը սկսվեց 2013 թվականին, երբ երկրի նախագահ Սալվա Կիիրը պաշտոնաթող արեց փոխնախագահ Ռիեկ Մաշար Թենիին ու կառավարության անդամներին: Սա դինկա և նուեր ժողովուրդների միջև հակամարտության պատճառ դարձավ:
2015 թվականին Թենին և Կիիրը խաղաղության համաձայնագիր կնքեցին, իսկ հաջորդ տարի պայմանավորվեցին ազգային միասնության կառավարություն ստեղծել: 2016-ի հուլիսին, սակայն, բախումները վերսկսվեցին: 2018 թվականին Հարավային Սուդանի իշխանություններն ու ապստամբները նորից խաղաղության պայմանագիր ստորագրեցին:
ՄԱԿ-ի տվյալներով՝ Հարավային Սուդանում ջարդերի ժամանակ 10 հազար մարդ է զոհվել, ավելի քան 2.2 մլն մարդ փախստական է դարձել:
