21.11.2024 | 23:30
Թուրքիայում ընդդիմադիր քաղաքապետներին դատապարտել են ազատազրկման «ահաբեկչության» մեղադրանքով
Փաշինյանը ԿԲ նախագահի հետ քննարկե՞լ է արտաքին պարտքի շեմը բարձրացնելու հարցը․ մեկ ամիսն անցել է
Տնտեսություն
10.04.2019 | 15:59
Կառավարության մարտի 7-ի նիստի օրակարգային հարցերի քննարկումից առաջ վարչապետ Նիկոլ Փաշինյանն անդրադարձել էր Բրյուսել կատարած իր այցին և խոսել ԵՄ բարձրաստիճան պաշտոնյաների հետ ունեցած հանդիպման արդյունքներից։
Վարչապետը, մասնավորապես, նշել է, որ ԵՄ գործընկերները պատրաստ են ֆինանսավորել ՀՀ-ում իրականացվող մի շարք ծրագրեր, բայց ոչ 100 տոկոսով․ այդ ֆինանսավորման մի մասը պետք է վճարի Հայաստանը, սակայն դա կարող է արվել արտաքին միջոցների ներգրավմամբ, ինչն էլ այս պահին հնարավոր չէ, քանի որ արտաքին պարտքի համար սահմանված է հստակ շեմ։
«Մենք արդեն ունենք նախնական պայմանավորվածություն, որ մեկ ամսվա ընթացքում այս թեմայով Կենտրոնական բանկի հետ համատեղ քննարկում ենք ունենալու: Այդ քննարկման արդյունքում որևէ եզրակացության կգանք»,- նշել է Փաշինյանը։
Վարչապետի այդ ելույթից անցել է արդեն մեկ ամիս։
Factor.am-ը Կենտրոնական բանկից փորձեց ճշտել՝ արդյոք վարչապետ Նիկոլ Փաշինյանն արտաքին պարտքի շեմի բարձրացման թեմայով քննարկում ունեցե՞լ է ԿԲ նախագահի հետ և արդյոք այդ հարցի հետ կապված կա՞ արձանագրված որոշում։
Հարցին ի պատասխան Կենտրոնական բանկի հասարակայնության հետ կապերի բաժնի ղեկավար Հարություն Բերբերյանն ասաց․ «Վարչապետ Նիկոլ Փաշինյանն ու Կենտրոնական բանկի նախագահը հանդիպումներ ունեցել են, բայց դրանց բովանդակության մասին լիազորված չեմ որևէ բան ասել։ Իսկ ինչ վերաբերվում է՝ կա՞ արդյոք արտաքին պարտքի շեմի բարձրացման հետ կապված որոշում, ապա դա կայացնելու իրավասությունը Կառավարությանն է»։
Կառավարության պատասխանը կներկայացնենք ավելի ուշ։
Աղավնի Սուքիասյան
