Հասարակություն
09.04.2019 | 13:22ԲՀԿ քաղաքական թիմի գնահատմամբ՝ Նաիրա Զոհրաբյանն ունի բոլոր անհրաժեշտ մասնագիտական որակները, որպեսզի իրականացնի ԱԺ կանոնակարգով սահմանված իր գործառույթները: Լրագրողների հետ զրույցում այս մասին ասաց ԱԺ ԲՀԿ խմբակցության պատգամավոր Իվետա Տոնոյանը՝ պատասխանելով հարցին՝ անսալո՞ւ են վարչապետի կոչին և խմբակցությունում քննարկելո՞ւ են Նաիրա Զոհրաբյանին մարդու իրավունքների պաշտպանության հարցերի հանձնաժողովի նախագահի պաշտոնում մնալու նպատակահարմարության հարցը:
«Մենք, իհարկե, ծանոթ ենք վարչապետի հայտարարությանը, սակայն կարծում ենք, որ կա՛մ տեղեկատվության թյուրըմբռնում կա, կա՛մ վարչապետը, միգուցե, չի տիրապետում ամբողջական ինֆորմացիային: Որովհետև Նաիրա Զոհրաբյանը կանոնակարգով սահմանված իր գործառույթներն իրականացրել է հավուր պատշաճի»,- ասաց Իվետա Տոնոյանը:
Ըստ պատգամավորի՝ Նաիրա Զոհրաբյանն ԱԺ ամբիոնից ելույթ ունեցած տրանսգենդերին հրավեր չի ուղարկել. «Կարծում եմ՝ վերադառնալուն պես նա ավելի առարկայական կներկայացնի բոլոր ապացույցները: Այն փաստաթուղթը, որը նախօրեից շրջանառվում է, ընդամենը անվտանգությանը տրամադրված հասարակական կազմակերպությունների ցանկն է, որոնք գրանցվել են օնլայն հարթակում՝ լսումներին մասնակցության ցանկություն հայտնելով»:
Հարցին՝ ինչպե՞ս է վերաբերվում ԲՀԿ-ական պատգամավոր Վարդան Ղուկասյանի հայտարարությանը, թե բոլորը չէ, որ հավասար իրավունքներ ունեն, Իվետա Տոնոյանը պատասխանեց. «Դեռևս նախօրեին մեր հարցազրույցներում ասել ենք մեր դիրքորոշումը. ԲՀԿ-ն ազգային արժեհամակարգ պաշտպանող ուժ է: Մարդու իրավունքների հարց էստեղ մենք չենք դիտարկում, որևէ սահմանափակման հարց չենք դիտարկում կամ տրանսգենդերների լինել-չլինելու հարց չենք քննարկում»:
Մանրամասները՝ տեսանյութում:
Մհեր Արշակյան
