Հասարակություն
05.04.2019 | 14:31«Քաղաքը պետք չէ վարկաբեկել, այսօր քաղաքում 44 կմ ճանապարհ է կառուցվում, ճշմարտությունը թող խոսեն»,- պատասխանելով Factor.am-ի հարցին, թե որն էր իր ու ԱԺ «Լուսավոր Հայաստան» խմբակցության պատգամավոր Սարիկ Մինասյանի հետ վարչապետ Նիկոլ Փաշինյանի ներկայությամբ տեղի ունեցած լեզվակռվի պատճառը՝ ասաց Գյումրիի քաղաքապետ Սամվել Բալասանյանը։
Մեր հիշեցմանը, որ ներկայումս ԼՀԿ-ից ԱԺ պատգամավոր Սարիկ Մինասյանը ժամանակին աշխատել է Գյումրիի քաղաքապետարանում և տեղեկացված է քաղաքի կառուցապատման խնդիրներին, ինչով է Բալասանյանը պատճառաբանում իրենց հարաբերությունների վատացումը, վերջինս արձագանքեց․ «Ես բոլորի հետ էլ լավ հարաբերություններ ունեմ»։
Հիշեցնենք, որ այսօր Գյումրիում վարչապետ Նիկոլ Փաշինյանի աշխատանքային այցի ընթացքում հենց վարչապետի և լրագրողների ներկայությամբ Գյումրու քաղաքապետի և ԱԺ պատգամավոր Սարիկ Մինասյանի միջև լեզվակռիվ սկսվեց, նրանք միմյանց անվանեցին «կլյաուզնիկ»՝ չանսալով անգամ վարչապետի հորդորին՝ դադարեցնել լեզվակռիվը։
Նիկոլ Փաշինյանը վրդովվեց՝ ասելով․ «Կարո՞ղ է մի հատ էլ ստեղ քուչի կռիվ սկսեք, մի հատ հանգստացեք, այ քեզ բան»։
Գյումրու քաղաքապետ Սամվել Բալասանյանին Factor.am-ը հիշեցրեց նաև քաղաքապետի նախորդ ընտրություններում Նիկոլ Փաշինյանի կողմից իր հասցեին արված հայտարարությունն այն մասին, որ Գյումրիում էլ Սերժ Սարգսյանը ներկայացված է Բալասանյանի դեմքով:
«Ինձ ընտրել է 30,000 մարդ»,- արձագանքեց Գյումրու քաղաքապետը։
Նարեկ Կիրակոսյան
