18.12.2025 | 22:01
«Ավելի շատ նեղվածությունից այսպես եղավ»․ Տեր Վրթանեսին ստենտավորել են
Նիկոլ Փաշինյանը հարցաքննվեց․ ի՞նչ գործի շրջանակներում էր վարչապետը դատարան ներկայացել. ՏԵՍԱՆՅՈՒԹ
Հասարակություն
03.04.2019 | 19:28
Այսօր Երևանի ընդհանուր իրավասության դատարանում եռուզեռ էր։ Իսկ պատճառն այն էր, որ վարչապետն էր գալիս։ Նիկոլ Փաշինյանը դատարան էր եկել հարցաքննության։ Նա վկայի կարգավիճակ ուներ, վարչապետը դատարանում էր իր անձնագրով, որը, սակայն, չգործածեց, դատարանն ասաց՝ վկայի ինքնությունը բոլորին պարզ է։
Գործը, որի շրջանակներում վարչապետն այսօր հարցաքննվեց, վերաբերվում էր 2017 թվականին խորհրդարանական ընտրությունների նախաշեմին տեղի ունեցած միջադեպին։
Հիշեցնենք, այն ժամանակ Նիկոլ Փաշինյանը «Ելք» խմբակցությամբ մասնակցում էր ԱԺ-ի ընտրություններին, երբ ահազանգ հնչեց, որ վերջինիս շտաբի անդամներից մեկի նկատմամբ բռնություն է գործադրվել։ Այս գործով խուլիգանության հոդվածով մեղադրանք առաջադրվեց Արթուր Այվազյանին, որը առավել հայտնի է Մանախ մականվամբ։
Նա, հիշեցնենք, 15 տարվա ազատազրկման էր դատապարտվել Հոկտեմբերի 27-ի գործով կարևորագույն վկայի սպանությունը պատվիրելու և իրագործելու համար: Այս միջադեպի գործով Այվազյանը նախ կալանավորվեց, ապա գրավի դիմաց ազատ արձակվեց դեռևս 2017 թվականին:
Վարչապետն այսօր դատարանում ասաց, եթե դեպքի առնչությամբ մանրամասներ չհիշի կարող են իր նախքննական ցուցմունքը հրապարակել։ Նա դատարանում պատմեց կատարվածը, որին ականատես է եղել և հավելեց՝ դատարանից թաքցնելու բան չունի։
Քննչի հետ առնչություն ունենալու վերաբերյալ վարչապետին հարց հղեց Արթուր Այվազյանի պաշտպան Հայկ Ալումյանը, վերջինս, հիշեցնենք, զբաղվում է նաև կալանավորված Ռոբերտ Քոչարյանի և Քոչարյանին բաց նամակ հղած Վահան Շիրխանյանի պաշտպանությամբ։
Փաշինյանը դատարանում ասաց, որ քննիչը հեղափոխության օրերին իր աջակցությունն է հայտնել իրեն, ինչին հաջորդեց Հայկ Ալումյանի հարցը, թե ինչ խոսակցություն է եղել նրանց միջև, որին ի պատասխան վարչապետը նշեց՝ միայն գործի ընթացքի հետ կապված։
Ամբաստանյալը վարչապետին հարցեր չտվեց, ասաց չի ուզում, որ այս գործը որևէ մեկը քաղաքական կեղտոտ խաղերի համար օգտագործի:
Նիստի ավարտից հետո վարչապետը լրագրողների հարցին ի պատասխան նաև հայտնեց, որ մեկ այլ քրեական գործի շրջանակներում, այն է՝ Մարտի 1-ը, ինքը ևս հարցաքննվել է։
Մանրամասները՝ տեսանյութում։
Լիլիթ Շաբոյան
