Քաղաքականություն
25.03.2019 | 14:41Կառավարության մարտի 25-ի արտահերթ նիստում գործադիրը հավանության արժանացրեց որոշման նախագիծ, որով առանց մրցույթի ՀՀ 2019 թվականի պետական բյուջեից «Դպրոցներում STEM կրթության և ռոբոտատեխնիկայի զարգացման իրականացում» ծրագրի համար հատկացվեց 352,226.5 հազար դրամը՝ «Առաջատար տեխնոլոգիաների ձեռնարկությունների միություն» ՀԿ-ին ինժեներական լաբորատորիաների բնականոն գործունեությունն ապահովելու համար:
Ըստ նախագծի՝ ներկայում հանրապետության կրթական համակարգում գործում են «Արմաթ» ինժեներական 260 լաբորատորիաներ 304 խմբակավարներով, ինչպես նաև ծրագրի բնականոն ընթացքն ապահովելու համար ներգրավված են 13 մարզային համակարգողներ:
Լաբորատորիաների հիմնադրումը իրականացվել է Առաջատար տեխնոլոգիաների ձեռնարկությունների միության (ԱՏՁՄ) ջանքերով և մասնավոր ներդրողների, միջազգային, հասարակական և բարեգործական կազմակերպությունների, ԱՏՁՄ անդամ հանդիսացող կազմակերպությունների միջոցներով:
ԱՏՁՄ ջանքերի արդյունքում 2012-2018թթ.-ին ընդհանուր ներդրումների գումարը ոչ պետական հատվածի կողմից կազմել է շուրջ 880000.0 դրամ, որից 580000.0 դրամը՝ անհրաժեշտ սարքավորումների ու գույքի ձեռքբերման, նրանց սպասարկման, խմբակավարների վերապատրաստման և մոնիտորինգի համար, շուրջ 175000.0 դրամի ներդրումներ՝ համակարգչային ծրագրավորման, ռոբոտաշինության, մրցույթների ու ցուցահանդեսների, ամառային տեխնոլոգիական ու ինովացիոն ճամբարների կազմակերպման համար, շուրջ 125000.0 դրամի ներդրումներ՝ մեթոդաբանության մշակման և կատարելագործման, համապատասխան ուսուցողական նյութերի պատրաստման և էլեկտրոնային կայքի ստեղծման և սպասարկման համար:
Ընտրված «Արմաթ» ինժեներական լաբորատորիաների ծրագիրը անցել է միջազգային փորձագետների քննությանը և 2016 թ.-ի Բրազիլիայում կայացած ՏՏ համաշխարհային կոնգրեսի նիստում արժանացել է մրցանակի՝ որպես «Կայուն զարգացման կրթական լավագույն գործիք»:
Սկսած 2014թ-ից լաբորատորիաների խմբակավարների վարձատրության միջոցները հատկացվում են ՀՀ պետական բյուջեի միջոցներից:
2016թ.-ի մարտի 25-ին «Ինֆորմացիոն տեխնոլոգիաների ձեռնարկությունների միություն» ԻԱՄ-ի և ՀՀ կառավարության միջև ստորագրվել է Հուշագիր, որով կողմերը ծրագրել են համագործակցել «Կրթական համակարգում նախնական ինժեներական կրթության ներդրում» ծրագրի շրջանակներում ինժեներական լաբորատորիաների ներդրման նպատակով:
Հուշագրով ամրագրվել է, որ իրականացվող ծրագիրը լուրջ մրցակցային առավելություն է տալիս Հայաստանին միջազգային շուկայում, և կարող է հանդիսանալ 2019 թվականին Երևանում անցկացվելիք ՏՏ համաշխարհային կոնգրեսին (WCIT) Հայաստանի Հանրապետությունը՝ որպես տեխնոլոգիական երկիր ներկայացնելու առանցքային թեմաներից մեկը:
2019 թվականի ընթացքում նախատեսվում է ավելացնել խմբակների քանակը ևս 162-ով:
ՀՀ ԿԳ նախարարությունը կարևորում է հանրակրթական ուսումնական հաստատություններում տեխնիկական կրթության դասավանդման շրջանակում ինժեներական խմբակներում և ռոբոտաշինական լաբորատորիաներում իրականացվող աշխատանքներն ու աշխատանքներում ընդգրկված սովորողների կողմից ստեղծարար արժեքներին հաղորդակից լինելն ու նորարարությանը գործուն մասնակցություն ցուցաբերելը:
Մանրամասները՝ տեսանյութում։
