Արամ Մելքոնյանը հաղթեց Վարդենիսի ընտրություններում

Փետրվարի 17-ին հանրապետության 24 համայնքներում կայացան ՏԻՄ ընտրություններ․ 20-ում տեղի ունեցան համայնքի ղեկավարի,  4-ում` ավագանու անդամի ընտրություններ:

Այդ 20 համայնքների թվում էր Գեղարքունիքի մարզի Վարդենիս համայնքը, որտեղ նախընտրական կրքերն ամենաշատը բորբոքվեցին թեկնածուների միջև։

ԿԸՀ կայքում այսօր հրապարակվել են ՏԻՄ ընտրությունների նախնական արդյունքները, որից պարզ է դառնում, որ Վարդենիս համայնքի ղեկավար է ընտրվել այդ պաշտոնի ժամանակավոր պաշտոնակատար  Արամ Մելքոնյանը։

Նա ընտրություններին մասնակցող 8 թեկնածուներից ամենաշատ ձայն հավաքած թեկնածուն է․ ստացել է  1719 քվե։

Վարդենիս համայնքի ղեկավարի թեկնածու, օրեր առաջ Վարդենիս-Երևան ճանապարհը փակած և մարզպետ Գնել Սանոսյանի հրաժարականը պահանջող Գևորգ Սիմոնյանն ստացել է 591 ձայն։

Վարդենիսի համայնքի ժամանակավոր պաշտոնակատար Արամ Մելքոնյանի և  մարզպետի ընկերական կապերի մասին բարձրաձայնող, մարզպետին՝ իր ընկերոջն առաջ տանելու մեջ մեղադրող մեկ այլ թեկնածու՝ Կարեն Մկրտչյանը ստացել է 931 ձայն։

Նշենք, որ Արամ Մելքոնյանի թեկնածությանը սատարելու վերաբերյալ Factor.am-ի հարցին ի պատասխան Գեղարքունիքի մարզպետ Գնել Սանոսյանը նշել էր.  «Վարդենիսում քաղաքապետի հրաժարականից հետո կրքերը շատ թեժ են եղել, և տարբեր միջոցներով շատ մարդիկ փորձել են դառնալ քաղաքապետի ժամանակավոր պաշտոնակատար։ Այդ կրքերը հանդարտեցնելու համար որոշվեց այդ պաշտոնում նշանակել Արամ Մելքոնյանին, որն,  այո՛,  իմ համակուրսեցին է, քաղաքում շատ քիչ է եղել՝ կապված իր սպորտային և բիզնես գործունեության հետ, քաղաքական տարբեր խմբավորումների մաս չի կազմել։ Այդ նշանակումը կատարվեց շատ պարզ շեշտադրմամբ՝ կլինեն քաղաքապետի ընտրություններ և վարդենիսցիներն ում կընտրեն մենք հաճույքով կաշխատենք նրա հետ»։

Նշենք, որ ԿԸՀ-ի հրապարակած այս արդյունքները նախնական են: Վերջնական արդյունքները կհրապարակվեն ընտրություններից 5 օր անց՝ փետրվարի 22-ին։

Աղավնի Սուքիասյան