Հայաստանը սկզբնաղբյուր երկիր է թրաֆիքինգի համար. Վահրամ Կաժոյան

Հուլիսի 28-ին տեղի ունեցավ ասուլիս՝ նվիրված ՄԱԿ-ի Գլխավոր ասամբլեայի որոշմամբ թրաֆիքինգի դեմ պայքարի համաշխարհային օրվա հռչակմանը. տեղեկացնում է ՀՀ ԱԳՆ-ն:

Ասուլիսին մասնակցեց և լրագրողների հարցերին պատասխանեց ՀՀ ԱԳՆ միջազգային կազմակերպությունների վարչության պետ, ՀՀ-ում մարդկանց թրաֆիքինգի և շահագործման դեմ պայքարի հարցերով Խորհրդի աշխատանքային խմբի ղեկավար Վահրամ Կաժոյանը:

«Հայաստանը  սկզբնաղբյուր երկիր է թրաֆիքինգի համար:Այն երկրները, որտեղ ուղղված են մեր երկրի թրաֆիքինգային հոսքերը, մեծ աշխատանքներ պետք է տանեն՝ ավելի ակտիվ պայքար մղելով այս  չարիքի դեմ:   Աշխարհագրությունն այս հարցում երեք ուղղություն ունի. սեռական շահագործում, որը հիմնականում իրականացվում է Թուրքիայում և ԱՄԷ-ում, աշխատանքային շահագործում, որն իրականացվում է Թուրքիայում ու ՌԴ-ում: Քանի որ Թուրքիայի հետ դիվանագիտական հարաբերություններ չունենք, իհարկե, աշխատաներ իրականացնելը, համագործակցելը մեծ խնդիր է դառնում, իսկ մյուս երկրների հետ ակտիվ համագործակցություն է իրականացվում», – նշեց  Վահրամ Կաժոյանը:

ԱՄՆ Պետքարտուղարության` 2017թ. հունիսի 27-ին հրապարակված մարդկանց թրաֆիքինգի վերաբերյալ տարեկան զեկույցի համաձայն` Հայաստանը հինգերորդ տարին անընդմեջ դասվում է 1-ին խմբում՝ հանդիսանալով այդ խմբում ընդգրկված ԱՊՀ միակ երկիրը:

Հայաստանի Հանրապետությունը միացել է միջազգային հանրությանը «21-րդ դարի ստրկության» դրսևորման ձևերի դեմ պայքարին և վավերացրել ՄԱԿ-ի «Անդրազգային կազմակերպված հանցավորության դեմ պայքարի» 2000թ. կոնվենցիան և դրան կից` «Ցամաքով, ծովով և օդով միգրանտների անօրինական փոխադրումների դեմ» թիվ 1 ու «Մարդկանց, հատկապես կանանց և երեխաների առևտրի կանխարգելման, արգելման և պատժի մասին» թիվ 2 կամընտիր արձանագրությունները, ՄԱԿ-ի «Երեխայի իրավունքների մասին» կոնվենցիային կից կամընտիր արձանագրությունը «Մանկավաճառության, երեխաների մարմնավաճառության և մանկական պոռնոգրաֆիայի մաuին», Եվրոպայի խորհրդի 2005թ. «Մարդկանց շահագործման (թրաֆիքինգի) դեմ պայքարի մասին» կոնվենցիան: