14.11.2026 | 10:48
«Մեզնից կախված ամեն ինչ անելու ենք, որպեսզի նրանք ազատ արձակվեն»․ Փաշինյանը՝ Բաքվում պահվող հայ գերիների մասին․ ՏԵՍԱՆՅՈՒԹ
«Մեզնից կախված ամեն ինչ անելու ենք, որպեսզի նրանք ազատ արձակվեն»․ Փաշինյանը՝ Բաքվում պահվող հայ գերիների մասին․ ՏԵՍԱՆՅՈՒԹ
Քաղաքականություն
14.11.2026 | 10:48
Բաքվում պահվող հայ գերիների ազատարձակման հարցը մշտապես Հայաստանի իշխանությունների օրակարգում է և բարձրացվում է դիվանագիտական շփումների ընթացքում։ Այս մասին Դուբլինի Միջազգային և եվրոպական հարցերի ինստիտուտում (IIEA) կայացած հանդիպման ժամանակ հայտարարեց ՀՀ վարչապետ Նիկոլ Փաշինյանը։
Նա ասաց, որ Բաքվում պահվող հայերի ազատարձակման խնդիրը լուծելու համար անհրաժեշտ է ամրապնդել տարածաշրջանում խաղաղությունը, քանի որ թշնամանքի խորացումը կարող է խոչընդոտել այդ գործընթացին։
«Բանտարկյալների խնդիրը մեր իրողության մեջ կարևոր խնդիրներից է: Բայց այդ, խնդիրը լուծելու համար մեզ անհրաժեշտ է ամրապնդել խաղաղությունը: Այլապես այն չի լուծվի»,- նշեց վարչապետը՝ հավելելով, որ բանտարկյալների առկայությունը թշնամական մթնոլորտի արտացոլումն է։
Նա հայտարարեց, որ եթե Հայաստանի և Ադրբեջանի միջև թշնամանքը խորանա, ապա գերիների ազատարձակման հարցը չի լուծվի։
Միևնույն ժամանակ Փաշինյանը վստահեցրեց, որ հայկական կողմը շարունակելու է ջանքեր գործադրել Բաքվում պահվող հայերի վերադարձն ապահովելու համար։
«Մենք երբեք չենք մոռանում այդ խնդիրը և մենք շարունակելու ենք, ինչ խոսք, մեզնից կախված ամեն ինչ անել, որպեսզի այդ մարդիկ բանտից ազատ արձակվեն»,- ասաց նա՝ նշելով, որ հարցը մշտապես բարձրացվում է դիվանագիտական շփումների ժամանակ։
Անդրադառնալով հայ-ադրբեջանական հարաբերություններին՝ վարչապետը հայտարարեց, որ զայրույթի և թշնամանքի վրա հիմնված քաղաքականությունը կնշանակի հակամարտության ու պատերազմի շարունակություն։
«Մեր նպատակն է հաղթահարել զայրույթը, թշնամանքը, հակամարտությունը, հուսահատությունը և բերել հույս, բերել խաղաղություն, բերել խոստումնալից ապագա»,- ասաց Փաշինյանը։
Խոսելով «Իրական Հայաստան» գաղափարախոսության մասին՝ վարչապետը նշեց, որ այն բխում է հայ ժողովրդի պատմությունից և Հայաստանի պետական շահերից։
Փաշինյանը հայտարարեց, որ Հայաստանը պետք է դադարի ապավինել այլ պետություններին և առաջին հերթին հենվի սեփական ուժերի վրա։
«Մենք պետք է փոխենք մեր ժողովրդի ճակատագիրը, դրա համար մենք պետք է հաղթահարենք զայրույթը, թշնամանքը և հուսահատությունը, հուսալքումը, պետք է դադարենք հենվել ուրիշների վրա, պետք է հենվենք մեզ վրա»,- ասաց վարչապետը՝ ընդգծելով, որ Հայաստանի Հանրապետությունն է իր քաղաքացիների ազգային շահերին ամբողջությամբ նվիրված սուբյեկտը։
Մանրամասները՝ տեսանյութում։
Եվգենյա Համբարձումյան
