Կացության գործերի կառավարման նոր հարթակն արդեն գործում է․ ինչպես գրանցվել և դիմում ներկայացնել

Նոյեմբերի 1-ից գործարկվել է կացության գործերի կառավարման նոր՝ mcs-permits.am էլեկտրոնային հարթակը, որի միջոցով այսուհետ հնարավոր է ներկայացնել նոր դիմումներ։

ՄՔԾ-ից տեղեկացնում են, որ նոր համակարգի գործարկմամբ պայմանավորված՝ workpermit.am հարթակով այլևս հնարավոր չէ նոր դիմումներ ներկայացնել։ Միևնույն ժամանակ, նախկին հարթակով արդեն ներկայացված դիմումների ընթացքին հետևելու հնարավորությունը պահպանվում է։

Փոփոխություն է նախատեսվել նաև ժամանակավոր կացության քարտերի և բնակության օրինականությունը հավաստող տեղեկանքների ժամկետի երկարաձգման կարգում։ Եթե նախկին հարթակում նման հնարավորություն կար, ապա նոր՝ mcs-permits.am հարթակում մինչև գործող քարտի ժամկետի ավարտը հնարավոր է ներկայացնել միայն «Նոր դիմում»։

Ովքեր և ինչպես կարող են գրանցվել նոր հարթակում

Նոր դիմում ներկայացնելու համար անհրաժեշտ է մուտք գործել mcs-permits.am և գրանցվել երկու տարբերակներից մեկով։

Խիստ նույնականացմամբ կարող են գրանցվել՝

• ՀՀ քաղաքացիները,
• իրավաբանական անձանց տնօրենները,
• ՀՀ-ում կացության կարգավիճակ ունեցող օտարերկրյա քաղաքացիները։

Հարցաթերթիկ-դիմումի լրացման միջոցով անհատական դիմում կարող են ներկայացնել՝

• աշխատանքային պայմանագիր ունեցող՝ ֆիզիկական անձ հանդիսացող ԵԱՏՄ քաղաքացիները,
• օտարերկրյա անհատ ձեռնարկատերերը,
• ազգությամբ հայ օտարերկրյա քաղաքացիները։

Գրանցումն ավարտելուց հետո անհրաժեշտ է սեղմել համակարգի «Մուտք» կոճակը և մուտք գործել անձնական օգտահաշիվ։

Նոր հարթակը նախատեսված է կացության գործերի կառավարման և համապատասխան դիմումների ներկայացման գործընթացը թվային եղանակով իրականացնելու համար։