Քաղաքականություն
10.11.2026 | 18:45«Նուբարաշեն»-ի բանտ տեղափոխվելու 20-րդ օրը նախնական տվյալներով ինֆարկտից մահացել է «Ուժեղ Հայաստան» կուսակցության Ստեփանավան համայնքի ղեկավարի թեկնածու առաջադրված 46-ամյա Արսեն Գևորգյանը։
«Հիմնարկում գտնվելու ընթացքում առողջական խնդրի մասին ընդհանրապես չի բարձրաձայնվել, այսինքն՝ ինքնազգացողության վատացում անձը չի ունեցել։ Այսօր առավոտյան շուտ բողոքել է ինքնազգացողությունից, ժամը 07:55-ի շրջանում բուժակը այցելել է և զննություն է կատարել, հետո՝ կարճ չանցած, շտապօգնություն է կանչվել, որից հետո արձանագրվել է սրտի կանգ»,- լրագրողների հետ ճեպազրույցի ժամանակ ասաց արդարադատության նախարար Սրբուհի Գալյանը:
Որ Գևորգյանը գանգատներ չի ունեցել, հայտարարում է ոչ միայն Քրեակատարողական ծառայությունը, այլև «Ուժեղ Հայաստան»-ից նրա կուսակից Տիգրան Աբրահամյանը․ «Իմ տեղեկություններով՝ չուներ, ողջ և առողջ էր։ Առողջական որևէ խնդիր, գանգատ, իմ տեղեկություններով, չի ունեցել։ Այս կարված, շինծու քրեական գործի շրջանակներում կալանավորումները լավ բանի չեն բերում»։
Արսեն Գևորգյանը մեղադրյալի աթոռին էր հայտնվել և կալանավորվել Ստեփանավանի ՏԻՄ ընտրություններից 4 օր առաջ։ Ստեփանավանը համայնքներից միակն էր, որտեղ «Ուժեղ Հայաստան» կուսակցությունը տեղական իշխանություն ձևավորելու հայտ էր ներկայացրել։ Հոկտեմբերի 21-ին Հակակոռուպցիոն կոմիտեն գաղտնի նկարահանված տեսանյութ հրապարակեց, որում, ըստ կառույցի, պատկերված էր կուսակցության Ստեփանավանի գրասենյակն ու «Ուժեղ Հայաստանի» համայնքապետի թեկնածուն։
Ըստ Կոմիտեի՝ Գևորգյանն ընտրությանը մասնակցելու և այդ քաղաքական ուժի օգտին քվեարկելու պայմանով մի քանի տասնյակ ընտրողների ընտրակաշառք է տվել։ Մինչ տեսանյութի տարածումը՝ վաղ առավոտից «Ուժեղ Հայաստան»-ի Ստեփանավանի գրասենյակում խուզարկություններ էին իրականացվել, ձերբակալվել էր 14 անձ։
Այդ օրվա գործողություններն «Ուժեղ Հայաստան»-ը քաղաքական հետապնդում է որակում, իսկ այսօրվա՝ իրենց գործընկերոջ մահը՝ Փաշինյանի իշխանության քաղաքական հետապնդումների հետևանք։
«Բանտում հերթական ընդդիմադիր գործչի մահվան պատասխանատվությունն էլ այսօրվա իշխանություններն են կրում՝ կառավարության ղեկավար Նիկոլ Փաշինյանի գլխավորությամբ»,- ասում է Տիգրան Աբրահամյանը։
Այնինչ, կառավարության ներկայացուցիչ Սրբուհի Գալյանն այստեղ իրենց բաժին պատասխանատվությունը չի տեսնում․ ««Ուժեղ Հայաստան»-ը մեղադրո՞ւմ է, ո՞ւմ է մեղադրում, իշխանություններին մարդկանց կալանավորելո՞ւ մեջ։ Կարծում եմ, որ պետությունը միշտ պետք է պատշաճ արձագանք տա կատարված արարքներին կամ ենթադրյալ կատարված արարքներին, և սա պետության գործառույթն է՝ հետևել հանցագործություններին ու դրանց բացահայտմանը»։
Իրավապաշտպան Զարուհի Հովհաննիսյանը մատնանշում է «Նուբարաշեն» ՔԿՀ-ի պահման վատ պայմանները՝ չբացառելով, որ տեղի ունեցածում կարող է դա ևս իր դերակատարումն ունենալ։
«Խցային պայմաններում գտնվելիս և՛ սթրեսային իրավիճակը, և՛ բանտային պայմանները նպաստում են, որպեսզի նյարդային, հոգեբանական և արյունատար համակարգի հետ կապված խնդիրները սրվեն։ Եվ դա նորություն չեմ ասում, բանտային կալանքը ունենում է իր ազդեցությունը մարդու առողջական իրավիճակի վրա»,- ասում է Հովհաննիսյանը։
Եվ մինչ Սրբուհի Գալյանը հայտարարում է, որ կալանքը բացառիկ խափանման միջոց է և խիստ անհրաժեշտ դեպքերում է կիրառվում, իրավապաշտպան համայնքը և ընդդիմությունը հակադարձում են՝ կալանքը կիրառվում է որպես պատժիչ միջոց։
«Կալանքը, որպես խափանման միջոց, ի սկզբանե իրավական պետության համար ծնվել է որպես կանխարգելիչ միջոց, որպես խափանման միջոցներից ամենածանրը՝ նախաքննության ընթացքում որոշակի հանցագործություններ կանխարգելելու համար։ Մեր երկրում, հետպատերազմյան Հայաստանում, կալանքը դարձավ պատժիչ մահակ ընդդիմադիր հայացքներ ունեցող քաղաքացիների համար»,- նշում է «Ուժեղ Հայաստան» կուսակցության անդամ Գոհար Մելոյանը։
Տարեսկզբից մինչ օրս սա բանտերում գրանցված մահվան 4-րդ դեպքն է։ Քրեական վարույթ է նախաձեռնվել, բայց այսպիսի գործերի քննությունն էական արդյունք չի ունենում։
«Հանրությունը որևէ վարույթով չի ունեցել մահվան դեպքերով ամբողջական քննության հանրությանը ներկայացնելու օրինակ, թե հատկապես ո՞ր փուլում է տեղի ունենում անձի կյանքի իրավունքի խախտման հետ կապված խնդիրը, ո՞ր աշխատողն է պատասխանատու, և արդյո՞ք բավարար միջոցներ կիրառել է տվյալ հիմնարկը՝ պահպանելու համար մարդու կյանքի իրավունքը, դա հիմնարար իրավունքներից մեկն է»,- ընդգծում է Զարուհի Հովհաննիսյանը։
Պատասխանատուներ և պատասխանատվություններ կլինե՞ն, այս մասին դեռ վաղ է խոսել։ Մինչ այդ ՄԻՊ-ն իր սեփական ուսումնասիրությունն է սկսել։
Մանրամասները՝ տեսանյութում։
Ռոզա Վարդանյան
