Ըմբշամարտի միջազգային ֆեդերացիան (UWW) Ղազախստանի մայրաքաղաք Աստանայում կայացած աշխարհի առաջնությունից հետո թարմացրել է դասակարգման աղյուսակները:
Հունահռոմեական ոճի ըմբիշներից լավագույն տասնյակում են Կարեն Ասլանյանը (63 կգ), Սլավիկ Գալստյանը (67 կգ) ու Գևորգ Թադևոսյանը (87 կգ): Աշխարհի նորընծա չեմպիոն Կարեն Ասլանյանը մեծ առաջընթաց է գրանցել ու դարձել է 63 կգ քաշային կարգի առաջատար, Սլավիկ Գալստյանը երկրորդն է 67 կգ քաշային կարգում, իսկ Գևորգ Թադևոսյանը չորրորդ տեղում է 87 կգ քաշայինների հաշվարկում:
Փարիզ-2024 Օլիմպիական խաղերի բրոնզե մեդալակիր, աշխարհի կրկնակի ու Եվրոպայի 5-ակի չեմպիոն Մալխաս Ամոյանը ԱԱ-ում անհաջող մրցելույթից հետո 17-րդ տեղ է նահանջել 77 կգ քաշային կարգում:
Ազատ ոճի ըմբիշներից լավագույն ցուցանիշն ունի աշխարհի փոխչեմպիոն դարձած Վազգեն Թևանյանը, որը երրորդ տեղ է բարձրացել 65 կգ քաշային կարգում: Եվրոպայի քառակի չեմպիոն, աշխարհի առաջնության քառակի բրոնզե մեդալակիր Արսեն Հարությունյանը 14-րդն է 61 կգ քաշային կարգում:
