Զրպարտում են. մենք մեզնի՞ց էինք հափշտակում. Դավիթ Ղազինյան. ՏԵՍԱՆՅՈՒԹ

«ՀԷՑ-ին շուրջ 64.5 մլրդ դրամի վնաս պատճառելու, հափշտակության և փողերի լվացման գործով Քննչական կոմիտեն զրպարտում է»,- Factor TV-ի հետ զրույցում ասաց «Ուժեղ Հայաստան» խմբակցության պատգամավոր Դավիթ Ղազինյանը, որը զբաղեցրել է ՀԷՑ ՓԲԸ-ի նախկին գլխավոր տնօրենի պաշտոնակատարը։

Պատգամավորը պնդում է, որ ՀԷՑ-ի շահաբաժինների վճարումը չի կարող դիտարկվել որպես հափշտակություն, քանի որ ընկերության սեփականատերն իրավունք ունի տնօրինելու հարկերը վճարելուց հետո ստացված շահույթը։ Նա չի ծանոթացել քրեական վարույթի նյութերին, սակայն համոզված է, որ փողերի ծագման քողարկում չի եղել։

«Եթե մի բանը կոչվում է շահաբաժին, այսինքն՝ շահույթ, որը օրինական վերցվել է, իրավունք ունի օգտագործի սեփականատերը ինչպես կամենա»,- պնդեց Ղազինյանը։

Նրա համոզմամբ՝ 36 անձի՝ այդ թվում իրենց առաջնորդ, տնային կալանքի տակ գտնվող Սամվել Կարապետյանի նկատմամբ հանրային քրեական հետապնդում հարուցելը քաղաքական շոու է, որի նպատակը իշխանությունների համար սահմանադրական հանրաքվեի անցկացումն ապահովելն է։

«Շոուն պետք է ապահովել ընդամենը, նորից եմ ասում, այստեղ խոսել տնտեսական հանցագործության մասին աբսուրդ է»,- հայտարարեց Ղազինյանը։

Ընդդիմադիր պատգամավորը քրեական վարույթը կապում է նաև Սամվել Կարապետյանի ձերբակալման հետ՝ պնդելով, որ իշխանությունները փորձում են ճնշում գործադրել ընդդիմության վրա՝ սահմանադրական փոփոխություններին աջակցելու համար։
Պատգամավորը չի բացառում, որ իշխանությունները կարող են քրեական հետապնդում սկսել նաև իր նկատմամբ։ Միևնույն ժամանակ, Ղազինյանն ընդգծեց, որ չի պատրաստվում համագործակցել Նիկոլ Փաշինյանի իշխանության հետ՝ նույնիսկ անազատության մեջ հայտնվելու վտանգի դեպքում։

«Ես կնախընտրեմ անազատությունը, քան Փաշինյանի հետ շփվելը, էլ ուր մնաց՝ գործարքը»,- ասաց նա։

Մանրամասները՝ տեսանյութում։

Արփի Հակոբյան