Փոխանակ ասեք՝ Спасибо, многоуважаемые коллеги, եկել եք ասում եք՝ «արտահանումը նվազել է»․ Ալեքսանյան. ՏԵՍԱՆՅՈՒԹ

Ազգային ժողովում «Ծառայությունների առևտրի և ներդրումների մասին Հայաստանի Հանրապետության կառավարության և Արաբական Միացյալ Էմիրությունների կառավարության միջև» համաձայնագիրը վավերացնելու մասին նախագծի քննարկման ընթացքում ԱԺ փոխանախագահ Վահագն Ալեքսանյանն անդրադարձավ արտահանման ծավալների նվազման վերաբերյալ ընդդիմադիրների քննադատություններին և Նարեկ Կարապետյանի քաղաքացիության շուրջ ծագած աղմուկին։

Խոսելով արտահանման ցուցանիշների մասին՝ Ալեքսանյանը հայտարարեց, որ որոշ շրջանակներ կոնկրետ մի երկրում արհեստական խոչընդոտներ են ստեղծել հայկական ապրանքների արտահանման համար՝ նպատակ ունենալով աջակցել ընդդիմությանը Հայաստանում իշխանության գալու հարցում։

«Որոշ շրջանակներ շատ կոնկրետ մի երկրում փորձել են այնպես անեն, որ դուք ընտրվեք Հայաստանում իշխանություն, արտահանման համար արհեստական խոչընդոտներ են ստեղծել ձեր համար։ Ձեր համար ամեն մի չարտահանված ծիրանը, պարո՛ն Կարապետյան, չի արտահանվել, որպեսզի դուք դառնաք իշխանություն»,- ասաց Ալեքսանյանը։

Նա հավելեց, որ ընդդիմադիրները, փոխանակ գնահատելու այդ քայլերը, եկել են խորհրդարան և դժգոհում են արտահանման ցուցանիշներից։

Ալեքսանյանը նաև անդրադարձավ Նարեկ Կարապետյանի քաղաքացիության վերաբերյալ Արամ Վարդևանյանի դիտարկմանը։ Նա հեգնանքով ներողություն խնդրեց՝ նշելով, որ Նարեկ Կարապետյանին Ռուսաստանի քաղաքացի են անվանել՝ հիմնվելով ռուսական պաշտոնական ռեգիստրում առկա տվյալների վրա։

«Ներողությո՛ւն, պարո՛ն Կարապետյան, հազա՛ր ներողություն, ձեզ անվանել են Ռուսաստանի քաղաքացի, որովհետև Ռուսաստանի պետական, պաշտոնական ռեգիստրում գրած է եղել՝ «Նարեկ Կարապետյան, гражданин Российской Федерации»։ Հազա՛ր ներողություն, որ հավատացել ենք այդ ռուսական պաշտոնական փաստաթղթերին, որը, իհարկե, շատ արագ Ռուսաստանի փոխարտգործնախարարը, եթե չեմ սխալվում, կես ժամվա մեջ հերքեց»,- ասաց պատգամավորը։

Ելույթի ավարտին Ալեքսանյանը հեգնեց, որ շնորհակալ են Ռուսաստանի արտաքին գերատեսչությանը՝ Հայաստանի ընտրությունների նկատմամբ ցուցաբերած օպերատիվ ուշադրության համար։

Մանրամասները՝ տեսանյութում։

Եվգենյա Համբարձումյան