18.12.2025 | 17:21
Մալաթիայի «Ոսկու շուկա»-ի տնօրենը ձերբակալվել է ապօրինի զենք կրելու կասկածանքով
ՀԿ-ի դիտորդը հայտարարում էր, որ ԲՀԿ-ից է. ինչո՞ւ էր Ծառուկյանը 11 հազար դիտորդ ներդրել ընտրություններին. ԼՈՒՍԱՆԿԱՐՆԵՐ
Քաղաքականություն
11.12.2018 | 15:55
ՀՀ Ազգային ժողովի արտահերթ ընտրությունների ժամանակ դիտորդական առաքելություն է իրականացրել 22 կազմակերպություն: Այս մասին տեղեկանում ենք Կենտրոնական ընտրական հանձնաժողովի պաշտոնական կայքից:
Գրանցված դիտորդական կազմակերպությունների ցանկը ուսումնասիրելիս աչքի է ընկնում երկու դիտորդական կազմակերպություն, որոնք ունեին ամենաշատ դիտորդներ։ Այդ կազմակերպություններն են «Միացյալ առաջնորդների պալատը», որը ուներ 5411 դիտորդ և «Աբովյանի ուսանողական խորհուրդը», որն էլ դիտորդական առաքելություն էր իրականացնում 5406 դիտորդով:
Մեզ տեղեկություններ փոխանցեցին այն մասին, որ այս կազմակերպությունները իրականացնում են արհեստական դիտորդական առաքելություն, որի միակ նպատակը ընտրութունների ժամանակ «Բարգավաճ Հայաստան» կուսակցության շահերի սպասարկումն է:
Ի դեպ, երեկ 10/50 ընտրատեղամասում «Միացյալ առաջնորդների պալատի» դիտորդը հայտարարում էր, որ ինքը ներկայացնում է ԲՀԿ-ն: Մեկ այլ աղբյուրից էլ տեղեկացանք, որ այդ երկու կազմակերպությունների 10 հազարից ավելի դիտորդներին որպես աշխատավարձ վճարվել է 10 հազար ՀՀ դրամ, իսկ նպատակը եղել է այն, որ այդ անձանց միջոցով նրանց ընտանիքի անդամներին ևս ներգրավեն ԲՀԿ-ին քվե տալու գործընթացում:
Ի դեպ, «Հետքը» գրել էր, որ «Միացյալ առաջնորդների պալատ» ՀԿ-ն գրանցված է ՀՀ երիտասարդական խորհրդարանի ԲՀԿ խմբակցության քարտուղար Լիաննա Մանուկյանի բնակության հասցեում: Այս փաստը ևս ցույց է տալիս, որ այս կազմակերպությունը փոխկապակցված է «Բարգավաճ Հայաստան» կուսակցության հետ: Իսկ ահա «Աբովյանի ուսանողական խորհուրդի» ֆեյսբուքյան էջը ողողված է ԲՀԿ-ական պատգամավորության թեկնածուների քվեաթերթիկներով, ավելին՝ նույն քվեաթերթիկում ընդգծված են որոշ թեկնածուներ, որոնց որ առաջարկում է խորհուրդն ընտրել, իսկ ԲՀԿ-ական պատգամավորներն էլ ակտիվ լայքում են այդ հրապարակումները:
«Աբովյանի ուսանողական խորհուրդի» ֆեյսբուքյան էջում հրապարակված են բազմաթիվ լուսանկարներ և տեսանյութեր, որոնք ևս փաստում են այս կազմակերպության և ԲՀԿ-ականների ջերմ կապերի մասին: Անգամ, նրանք միասին նախորդ ամիս զվարճացել են Գագիկ Ծառուկյանին պատկանող «Փարավոն» ռեստորանային համալիրում:
Ուշագրավը նաև այն է, որ Աբովյանի ուսանողական խորհուրդը հատկապես «բարգավաճել է» ընտրություններից մեկ ամիս առաջ: Մասնավորապես, 2018 թվականի նոյեմբերի 6-ին խորհուրդը հայտարարություն է տարածել, որի համաձայն իրենց շարքերը համալրվել են և կոչ են անում շարունակել միանալ կազմակերպությանը:
«Այսօր (նոյեմբերի 6-ին, հեղ.) անց կացվեց Աբովյանի ուսանողական խորհրդի հերթական ժողովը։ Մենք սիրով և մեծ ջերմությամբ մեր շարքերն ընդգրկեցինք մեր նոր անդամներին։ Օր օրի շարունակվում է աճել մեր մեծ ընտանիքը։ Ընդունելությունը շարունակվում է, և մենք սիրով սպասում ենք բոլորիդ»,- ասված է հաղորդագրության մեջ։
«Աբովյանի ուսանողական խորհուրդի», «Միացյալ առաջնորդների պալատի» և ԲՀԿ-ականների ջերմ կապերի պատճառը հասկանալու նպատակով փորձեցինք մեկնաբանություններ ստանալ ԲՀԿ առաջնորդ Գագիկ Ծառուկյանի մամուլի խոսնակ Իվետա Տոնոյանից և ԲՀԿ երիտասարդական միության նախագահ Վահե Էնֆիաջյանից: Սակայն Վահե Էնֆիաջյանը երկու օր շարունակ մեր զանգերին չպատասխանեց, իսկ Իվետա Տոնոյանն ասաց. «Ես պետք է ճշտեմ: Աբովյանի ուսանողական խորհրդի նախագահին ճանաչում եմ, գիտեմ, բայց էն մյուսը պետք է ճշտեմ»:
Մեր դիտարկմանը, որ դիտորդներից մեկը 10/50 ընտրատեղամասում մեզ հետ զրույցում ասել էր, որ ԲՀԿ-ն է ներկայացնում, Տոնոյանը մեկնաբանեց. «Կարող է կան երիտասարդներ, որ կուսակցությունում են: Ձեզ ավելի ուշ կզանգահարեմ»:
Մեզ հասած տեղեկությունների վերաբերյալ, որ այդ դիտորդական առաքելության միակ նպատակն այն է եղել, որ այդ մոտ 11 հազար դիտորդները քվեարկեին ԲՀԿ-ի օգտին, ինչպես նաև իրենց ընտանիքներին ներգրավեին այդ գործընթացում, Իվետա Տոնոյանը խոստացավ պարզաբանում տալ ավելի ուշ, սակայն, ավելի ուշ մեր զանգերին չպատասխանեց:
Հայկ Վարդանյան
