13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
ՄԱԿ-ը հաստատել է միգրացիայի մասին համաձայնագիրը. մի շարք երկրներ դեմ են դրան
Քաղաքականություն
10.12.2018 | 17:37
ՄԱԿ-ի միջկառավարական համաժողովը հաստատել է անվտանգ և օրինական միգրացիայի Գլոբալ դաշնագիրը: Այն ընդունվել է Մարաքեշում ավելի քան 150 պետություններից տարբեր մակարդակի պատվիրակությունների մասնակցությամբ, գրում է ՌԻԱ Նովոստին:
Փաստաթուղթը, որի տեքստը մշակվել է ՄԱԿ-ի անդամ գրեթե պետությունների կողմից վեցամսյա քնննարկումների ընթացքում, իրավական առումով պարտավորեցնող չէ, այլ միայն այդ ոլորտում գլոբալ համագործակցության հնարավորություն է ստեղծում: Ակնկալվում է, որ դաշնագիրը կհաստատվի դեկտեմբերի 19-ին ՄԱԿ-ի Գլխավոր վեհաժողովի նիստում:
Փաստաթղթի համաձայն՝ խոսքը միգրանտների ուղարկող և ընդունող պետությունների միջև «միգրացիայի ոլորտում համագործակցության մեխանիզմների» մասին է: Սակայն նույնիսկ այս տեսքով այն բազմաթիվ վեճեր է առաջացնում: Փաստաթղթի հակառակորդները մտավախություն ունեն, որ դրա ընդունումը կհանգեցնին զարգացած երկրներ միգրանտների հոսքի աճին: Միաժամանակ, իրավապաշտպանները կարծում են, որ դաշնագրում հիշատակված միջոցները բավարար չեն միգրանտների իրավունքները պաշտպանելու համար:
Նշենք, որ Բելգիան, Բուլղարիան, Հունգարիան, Չեխիան, Սլովակիան, Իտալիան, Շվեյցարիան, Ավստրալիան և Իսրայելը որոշել են չմասնակցել համաժողովին, իսկ Դոնալդ Թրամփի վարչակազմը փաստաթղթի քննարկումներից հրաժարվել է դեռևս 2017 թվականի վերջին:
ՄԱԿ-ի գլխավոր քարտուղար Անտոնիու Գուտերեշի կարծիքով՝ Գլոբալ դաշնագիրը կնպաստի օրինական միգրացիայի դյուրացմանն այն երկրների շուկաներ, որոնք աշխատուժի կարիք ունեն:
ՄԱԿ-ի տվյալներով՝ ներկայում աշխարհում 68 մլն հարկադիր տեղահանված անձ կա, որոնց թվում՝ 25 մլն փախստական, 3 մլն փախստականի կարգավիճակ փնտրող և 40 մլն ներքին տեղահանված անձ:
