Քաղաքականություն
15.10.2026 | 17:23
Ռուսաստանը ներկայում դիմումներ չի ստացել TRIPP նախագծին (Թրամփի ուղի) մասնակցելու վերաբերյալ։ Այս մասին հայտարարել է ՌԴ արտաքին գործերի նախարար Սերգեյ Լավրովը Բաքվում կայացած մամուլի ասուլիսում, որտեղ մասնակցում է Ասիայում փոխգործակցության և վստահության միջոցների ամրապնդման խորհրդակցության գագաթնաժողովին։
«Այդ ամբողջ ենթակառուցվածքը մեզ ծանոթ է, այն տեխնոլոգիական առումով սպասարկվում է մեր կողմից։ Մենք այս նախագծին մասնակցելու վերաբերյալ դեռևս որևէ դիմում չենք ստացել, սակայն բոլոր շահագրգիռ կողմերը գիտեն մեր հնարավորությունների և պատրաստակամության մասին։ Մենք բազմիցս ողջունել ենք Հայաստանի և Ադրբեջանի միջև հարաբերությունների կարգավորման գործընթացը՝ ինչպես նախագահի, այնպես էլ արտաքին գործերի նախարարության մակարդակով։ Մենք ողջունել ենք Վաշինգտոնում ձեռք բերված համաձայնությունը։ Մենք պատրաստ ենք մասնակցել ենթակառուցվածքային նախագծերին և այդ մասին բազմիցս հայտարարել ենք։ «Ռուսական երկաթուղիներ» ընկերությունն ունի կոնցեսիոն պայմանագիր և գործում է «Հարավկովկասյան երկաթուղի» ընկերության շրջանակում»,- ասել է նա։
Միաժամանակ, Լավրովը կարևորել է, իր բնորոշմամբ, Թուրքիայի և Ադրբեջանի կողմից առաջարկված «3+3» ձևաչափը (ներառում է ՌԴ, Թուրքիան, Իրանը ու ՀՀ-ն, Ադրբեջանն ու Վրաստանը)։
«Մենք հավաքվել ենք մի քանի անգամ ու հիմա սպասում ենք, թե երբ կպայմանավորվեն Հայաստանն ու Ադրբեջանը՝ հաջորդը որ երկիրն է ընդունելու ԱԳ նախարարների հանդիպումը։ Ես կարծում եմ, կարելի է առաջիկա հանդիպումն անցկացնել Ադրբեջանում, հետո մյուսը՝ Երևանում։ Դա ճիշտ կլիներ»,- ասել է ՌԴ ԱԳ նախարարը։
Նա շեշտել է՝ Մոսկվան այդ ձևաչափին ակտիվ աջակցում է։
«Ինչո՞ւ եմ հիշատակում այս ձևաչափը։ Այն, ըստ էության, համապարփակ է և նվիրված չէ որևէ առանձին նախագծի, որը նախատեսվում է իրականացնել տարածաշրջանային ընդհանուր համատեքստից դուրս։ Հետևաբար, մենք ակտիվորեն աջակցում ենք Ադրբեջանի և Թուրքիայի առաջարկած «3+3» ձևաչափին»,- հայտարարել է Լավրովը։
Թարգմանությունը՝ Էմմա Չոբանյանի
