09.10.2026 | 15:35
Երևանում սպասվում են կարճատև անձրևներ
ԱՄՆ-ում Ուկրաինայի պատվիրակության հետ Ուիթկոֆի և Քուշների հանդիպումներին կմասնակցեն նաև եվրոպական երկրների և ՆԱՏՕ-ի ներկայացուցիչները
Քաղաքականություն
09.10.2026 | 14:24
Ուկրաինայի հարցերով ԱՄՆ նախագահի հատուկ բանագնացներ Սթիվ Ուիթկոֆը և Ջարեդ Քուշները Մայամիում կհանդիպեն ոչ միայն Կիևի պատվիրակության, այլև եվրոպական երեք երկրների ու ՆԱՏՕ-ի ներկայացուցիչների հետ։ Այս մասին Վաշինգտոնում լրագրողներին հայտնել են աղբյուրները, գրում է BBC-ի ռուսական ծառայությունը։
AFP-ն և Reuters-ը հաղորդում են, որ հանդիպումների ընթացքում կքննարկվեն «նոր գաղափարներ և առաջարկներ, որոնց մշակումն ամերիկացի բանակցողները սկսել են Ռուսաստանի և Ուկրաինայի հետ՝ տարածաշրջան կատարած վերջին այցի ընթացքում»։ Խոսքը սեպտեմբերին Ուիթկոֆի և Քուշների՝ Մոսկվա ու Կիև կատարած այցերի մասին է։ Այդ այցերից հետո որևէ նոր առաջարկի մասին չի հաղորդվել։ Ընդհանուր առմամբ, վերջին շաբաթներին Ռուսաստանի և Ուկրաինայի միջև պատերազմի դադարեցման նպատակով խորհրդակցությունները վերսկսելու հեռանկարների վերաբերյալ գնահատականները բացասական են եղել։
Հինգշաբթի ԱՄՆ պետքարտուղար Մարկո Ռուբիոն հայտարարել էր, որ հակամարտությունը հայտնվել է վտանգավոր փակուղում։ ՌԴ նախագահի մամուլի քարտուղար Դմիտրի Պեսկովի խոսքով՝ Կրեմլում համակարծիք են Ռուբիոյի գնահատականի հետ։
Ուկրաինական պատվիրակությունն ԱՄՆ-ում կմնա երկու օր։ Պատվիրակության կազմում են Ուկրաինայի նախագահի աշխատակազմի ղեկավար Կիրիլ Բուդանովը, Արտաքին հետախուզության ծառայության ղեկավար Ռուստեմ Ումերովը և Գերագույն ռադայում իշխող խմբակցության ղեկավար Դավիթ Արախամիան։
Մայամիում կայանալիք բանակցություններին, Ուիթկոֆից և Քուշներից բացի, կմասնակցեն ԱՄՆ Ազգային անվտանգության խորհրդի և Ֆինանսների նախարարության ներկայացուցիչները, ինչպես նաև Մեծ Բրիտանիայի, Գերմանիայի և Ֆրանսիայի ազգային անվտանգության հարցերով խորհրդականներն ու Եվրամիության և ՆԱՏՕ-ի ներկայացուցիչները։
Axios-ը, հղում անելով իր աղբյուրին, հայտնում է, որ հոկտեմբերի վերջին Սթիվ Ուիթկոֆը և Ջարեդ Քուշները կարող են մեկնել Ռուսաստան։
«Իրավիճակին ծանոթ աղբյուրի խոսքով՝ Ուիթկոֆը և Քուշները կարող են այս ամիս ավելի ուշ մեկնել Մոսկվա՝ Վլադիմիր Պուտինի հետ հետագա բանակցություններ վարելու համար»,- գրում է լրատվամիջոցը։
Թարգմանությունը՝ Էմմա Չոբանյանի
