«Գոնե իշմար տվեք՝ իմանանք»․ Փաշինյանի ժեստը ծիծաղ առաջացրեց ԱԺ դահլիճում. ՏԵՍԱՆՅՈՒԹ

Ազգային ժողովի հարցուպատասխանի ընթացքում պատգամավոր Գառնիկ Դավթյանը հարց է ուղղել վարչապետ Նիկոլ Փաշինյանին՝ Սյունիքում ադրբեջանցի զինծառայողի հայտնվելու և դրա շուրջ հնչող հայտարարությունների վերաբերյալ:

Դավթյանն իր հարցում անդրադարձավ Նիկոլ Փաշինյանի՝ նախորդ օրը հրապարակված հարցազրույցին: Նա նշեց, որ վարչապետի հայտարարությունները (ըստ որոնց՝ ադրբեջանցի զինծառայողը սահմանն անցել է թանձր մառախուղի հետևանքով կամ մոլորվել է) նույնությամբ համընկնում են ադրբեջանական ԶԼՄ-ների տարածած վերնագրերի հետ: Դավթյանը հարցրեց, թե արդյոք քննության չավարտված փուլում նման պնդումները չեն ազդում Քննչական կոմիտեի վերջնական եզրակացության վրա:

Նիկոլ Փաշինյանը սարկազմով պատասխանեց․ «Ճիշտն ասած, նախորդ օրը ադրբեջանական մամուլում հրապարակում տեսա, որ լուսինը պտտվում է Երկրագնդի շուրջ։ Կարծում եմ՝ այդ առիթով Հայաստանի Գիտությունների ազգային ակադեմիան պետք է շտապ նիստ հրավիրի և ձևավորի մեր ինքնիշխան դիրքորոշումը տվյալ հարցի վերաբերյալ»:

Փաշինյանը հավելեց, որ ըստ ընդդիմության տրամաբանության՝ եթե Ադրբեջանում գրում են, թե մառախուղ է, հայկական կողմը պետք է պնդի, որ երկինքն անամպ է: Նա ընդգծեց, որ «իրական Հայաստանում» ֆիզիկայի օրենքները գործում են բնականոն տրամաբանությամբ, և պետք չէ յուրաքանչյուր դեպքի շուրջ «չորրորդ համաշխարհային պատերազմ սկսել»:

Արձագանքելով վարչապետի պատասխանին՝ Գառնիկ Դավթյանը պնդեց, որ ադրբեջանցի զինծառայողը հանցագործություն է կատարել, մտել է տուն և կրակել կնոջ վրա:

«Հիմա դուք փորձում եք ձեր նախնական հայտարարություններով ինչ-որ ձևով «սվաղել»՝ ձեր բառապաշարով ասած։ Եթե խնդիր կա արտահանձնելու ու չեք կարողանում դա կանխել, որևէ ձևով չի ստացվում ձեր մոտ, կամ չեք կարողանում՝ իշմար տվեք, հասկանանք»,- նշեց Դավթյանը։

Վարչապետի համապատասխան ժեստերն ու պատասխանը ծիծաղ են առաջացրել ԱԺ նիստերի դահլիճում:

Մանրամասները՝ տեսանյութում։

Եվգենյա Համբարձումյան