ԱՄՆ-ում մահապատժի ընթացքում ողջ մնացած կինը գիտակցության է եկել

50-ամյա Քրիստա Փայքը, որն ԱՄՆ Թենեսի նահանգում մահապատժի ենթարկվելու ընթացքում դիմացել է մահացու դեղամիջոցի երկու ներարկման, գիտակցության է եկել և կարող է խոսել։ Այդ մասին նրա փաստաբանները հայտնել են BBC-ին։ Ներկայում Փայքը շարունակում է բուժումը հիվանդանոցում։ Այնտեղ նրան պահում են ձեռնաշղթաներով, գրում է  The Insider-ը։

Փայքը մահապատժի էր դատապարտվել 1995 թվականին կատարված սպանության համար և անցած չորեքշաբթի ողջ էր մնացել մահացու ներարկման երկու անհաջող փորձից հետո։ Թենեսի նահանգում նա պետք է դառնար վերջին 200 տարվա ընթացքում մահապատժի ենթարկված առաջին կինը։ Այն բանից հետո, երբ Փայքը ողջ է մնացել, նրան տեղափոխել են հիվանդանոց, որտեղ նա մի քանի օր անգիտակից վիճակում է եղել։

Նրա ապաքինումը փաստաբաններն ու բժիշկներն աննախադեպ են անվանում։ Ենթադրվում է, որ նա միակ մարդն է, որը կարողացել է ողջ մնալ մահացու ներարկումից հետո։

Ներկայում պաշտպանական կողմը երկարատև վերականգնման շրջան է ակնկալում։ Հայտնի չէ՝ արդյո՞ք Փայքին կրկին մահապատժի ենթարկելու փորձ կարվի։ Մահապատժի անհաջող փորձից հետո Թենեսիի իշխանությունները նահանգում կասեցրել են բոլոր մահապատիժների իրականացումը։

Քրիստա Փայքը մահվան էր դատապարտվել 1995 թվականին 19-ամյա Քոլին Սլեմերի սպանության համար։ Հանցագործության պահին նա 18 տարեկան է եղել։ Փայքը չի հերքել սպանությանը մասնակցությունը, սակայն նրա փաստաբանները տարիներ շարունակ փորձել են չեղարկել մահապատժի դատավճիռը՝ ի թիվս այլ հանգամանքների մատնանշելով մանկության տարիներին նրա նկատմամբ գործադրված սեռական բռնությունը և հոգեկան խանգարումները։ Մահապատժի անհաջող փորձից հետո պաշտպանական կողմը նահանգապետին խնդրել է մահապատժի դատավճիռը փոխարինել ցմահ ազատազրկմամբ։

Թարգմանությունը՝ Էմմա Չոբանյանի