Մոլդովան 60-օրյա արտակարգ դրություն է հայտարարել՝ վառելիքի թանկացման և ջրի պակասի պատճառով

Երեքշաբթի Մոլդովայի խորհրդարանը քվեարկել է էներգետիկայի և ջրամատակարարման ոլորտում 60-օրյա արտակարգ դրություն սահմանելու օգտին։ Որոշումը պայմանավորված է վառելիքի գների աճով և ուժեղ երաշտով․ գրում է rfi-ն։

Արտակարգ դրությունը, որը նախատեսվում է ուժի մեջ մտցնել շաբաթ օրը, Մոլդովայի իշխանություններին հնարավորություն կտա «օպերատիվ արձագանքել էներգիայի, վառելիքի և ջրի մատակարարման հնարավոր խափանումների դեպքում», ասվում է կառավարության հայտարարության մեջ։

Կառավարության առաջարկին կողմ է քվեարկել 54 պատգամավոր, դեմ՝ 20-ը, իսկ 22 պատգամավոր չի մասնակցել քվեարկությանը։

Վառելիքի համաշխարհային գները աճում են Մերձավոր Արևելքում պատերազմի սկսվելուց ի վեր, իսկ աննախադեպ երաշտը հանգեցրել է Եվրոպայի գետերում ջրի մակարդակի նվազմանը՝ լրացուցիչ ճնշում գործադրելով էներգամատակարարման վրա։

2.4 միլիոն բնակչություն ունեցող Մոլդովան, որը Եվրամիության անդամակցության թեկնածու երկիր է, 2022 թվականին Ռուսաստանի՝ Ուկրաինա ներխուժումից հետո զգալիորեն նվազեցրել է ռուսական էներգակիրներից կախվածությունը՝ հույսը դնելով ԵՄ երկրներից ներմուծումների վրա։

Սպասվում է, որ Մոլդովայի սպառողների համար գազի գները կբարձրանան։ Այդ պայմաններում կառավարությունը մտադիր է ավելացնել այս ձմռանը խոցելի ընտանիքներին կոմունալ վճարների հարցում աջակցելու համար նախատեսված բյուջեն։ Այդ աջակցությունը տարածվում է երկրի բնակչության մոտ կեսի վրա։

Մոլդովան նաև բախվել է Դնեստր և Պրուտ գետերում «ջրի լուրջ պակասի»։ Կառավարության տվյալներով՝ դա կարող է ազդել խմելու ջրի մատակարարման վրա։

Մոլդովայի նախագահ Մայա Սանդուն երկուշաբթի հայտարարել է, որ արտակարգ դրության սահմանումն անհրաժեշտ է, որպեսզի իշխանությունները կարողանան արագ որոշումներ կայացնել, եթե անհրաժեշտ լինի վառելիք գնել, եթե Դնեստրում ջրի մակարդակը շարունակի նվազել կամ վառելիքի գները շարունակեն աճել։

Ընդդիմադիր, ռուսամետ Սոցիալիստական կուսակցության առաջնորդ Իգոր Դոդոնը կառավարությանը կոչ է արել «գործել պրագմատիկ և անհապաղ սկսել Ռուսաստանի հետ գազի մատակարարման շուրջ բանակցություններ»։

Թարգմանությունը՝ Անահիտ Խաչատրյանի