«Հայ դատը չի խանգարում խաղաղությանը, խանգարում է թշնամու կողմից պարտադրվող նվաստացուցիչ պայմաններին»․ Իշխան Սաղաթելյան․ ՏԵՍԱՆՅՈՒԹ

Հայ դատի գրասենյակների և հանձնախմբերի հերթական խորհրդաժողովը տեղի ունեցավ, որին մասնակցում էին դաշնակցական ներկայացուցիչներ և հյուրեր աշխարհի տարբեր երկրներից։ Խորհրդաժողովի բացման խոսքում անդրադարձ կատարվեց Հայ դատի համակարգի շուրջ ստեղծված իրավիճակին, իշխանությունների վարած քաղաքականությանը, ինչպես նաև առաջիկա ռազմավարական անելիքներին։

ՀՅԴ անդամ, պատգամավոր Իշխան Սաղաթելյանն իր ելույթում ասաց, որ ներկայումս Հայաստանի իշխանությունները, Ադրբեջանի և Թուրքիայի հետ զուգահեռ, արշավ և քարոզչական հարձակում են սկսել Հայ դատի աշխարհասփյուռ ցանցի դեմ։

«Հերքվել են այն թեզերը, թե, իբր, Հայ դատի նպատակները հակասում են պետական շահին կամ սպասարկում են նեղ կուսակցական օրակարգեր։ Հայ դատի գործունեությունը և Հայաստանի Հանրապետության շահերը չեն կարող միմյանց հակասել. դրանք նույնական են։ Հայ դատը նեղ կուսակցական դատ չէ․ սա բովանդակ հայ ժողովրդի արդարության դատն է»,- նշեց Սաղաթելյանը։

Ըստ պատգամավորի՝ պետականությանը վտանգում է ոչ թե Հայ դատը, այլ Թուրքիայի ու Ադրբեջանի պահանջները բավարարող քաղաքականությունը, Հայոց ցեղասպանության միջազգային ճանաչումից հրաժարվելը, ներազգային պառակտվածությունը և Հայ Առաքելական Եկեղեցու դեմ արշավը։

Անդրադառնալով տարածաշրջանային զարգացումներին՝ պատգամավորը հայտարարեց, որ Հայ դատի համակարգը չի հակասում խաղաղության ձգտումներին. «Հայ դատը չի խանգարում խաղաղությանը. Հայ դատը խանգարում է թշնամու կողմից պարտադրվող նվաստացուցիչ պայմաններին։ Ծնկաչոք, մուրացած խաղաղությունը բերում է նոր պատերազմ և նոր կորուստներ»։

Ըստ ներկայացված հայեցակարգի՝ ազգային, մրցունակ և անվտանգ Հայաստան կերտելու պայքարն ընթանում է երկու անբաժանելի ճակատներով։

«Ներքին ճակատ՝ հայրենիքում. ՀՅԴ-ն պայքարում է պարտվողական մտածողության դեմ, ազգային իշխանության ձևավորման և պետության ողնաշարն ուղղելու համար։
Արտաքին ճակատ՝ սփյուռքում. Հայ դատի գրասենյակները պատնեշ են կանգնում ադրբեջանական լոբինգին, պաշտպանում են արցախահայության վերադարձի իրավունքը և հայկական շահերը»,- նշեց Սաղաթելյանը։

Մանրամասները՝ տեսանյութում։

Ռոզա Վարդանյան