22.09.2026 | 15:31
Նյու Յորքում քննարկվել են COP17-ի նախապատրաստական աշխատանքներն ու առաջնահերթությունները
Տնօրեն կա, որ 20 մլն դրամ է ստանում. ինչո՞ւ պետք է 1 մլն դրամով գա նախարար աշխատի. Չախոյան․ ՏԵՍԱՆՅՈՒԹ
Քաղաքականություն
22.09.2026 | 14:20
Հայաստանի կառավարության առաջարկած օրենսդրական նոր փաթեթը, որով նախատեսվում է գրեթե կրկնապատկել նախարարների և բարձրաստիճան պաշտոնյաների աշխատավարձերը, հանրային ու քաղաքական թեժ քննարկումների ալիք է բարձրացրել։ Ծրագրվող փոփոխությունները տարեկան ավելի քան 25 միլիարդ դրամի լրացուցիչ բեռ են ենթադրում պետական բյուջեի համար, ինչը լուրջ հարցադրումներ է առաջացրել հանրության շրջանում, թե որքանով է արդարացված նման ծախսը սոցիալական ընթացիկ խնդիրների համատեքստում։
Ազգային ժողովում տեղի ունեցած ճեպազրույցի ընթացքում «Քաղաքացիական պայմանագիր» խմբակցության պատգամավորները պաշտպանել են նախագիծը՝ պնդելով, որ հանրային ընկալման մեջ հարցը ոչ ճիշտ է ներկայացվում։
Պատգամավոր Տարոն Չախոյանի խոսքով՝ փոփոխությունները վերաբերում են ոչ միայն բարձրաստիճան պաշտոնյաներին, այլև պետական համակարգի շուրջ 20,000 աշխատակցի։ Ըստ նրա՝ առաջին կարգի և ավագ մասնագետների աշխատավարձերի բարձրացումն աշխատավարձային հիերարխիայով բնականորեն հանգեցրել է նաև բաժնի պետերի, վարչության պետերի, փոխնախարարների և նախարարների դրույքաչափերի վերանայմանը։
Իշխանության ներկայացուցիչները շեշտում են, որ պետական համակարգը չի կարողանում մրցակցել մասնավոր ոլորտի հետ, ինչի պատճառով առկա է որակյալ կադրերի արտահոսք։ Չախոյանը նշել է, որ մասնավոր ոլորտում բարձր օղակների ղեկավարների աշխատավարձերը հասնում են միլիոնավոր դրամների, ինչը պետական ապարատը զրկում է փորձառու մասնագետներ ներգրավելու հնարավորությունից։
Բացի այդ, պատգամավոր Արայիկ Աղաջանյանը հղում է արել միջազգային փորձին՝ պնդելով, որ բարձրատրվող պաշտոնյաների և կոռուպցիայի մակարդակի միջև գոյություն ունի հակադարձ համեմատական կապ։ Ըստ նրա՝ արժանապատիվ վարձատրությունը նվազեցնում է ապօրինի եկամուտներ փնտրելու մղումները և բարձրացնում պետական ծառայության որակը։
Չնայած իշխանության բերած տնտեսագիտական և կառավարչական փաստարկներին՝ նախագիծը միանշանակ չի ընդունվում։ Քննադատները մատնանշում են, որ երկրում նվազագույն աշխատավարձի և կենսաթոշակների ներկայիս մակարդակի պայմաններում պաշտոնյաների եկամուտների նման կտրուկ աճն առաջացնում է սոցիալական անարդարության զգացում։
Մանրամասները՝ տեսանյութում։
Նարեկ Կիրակոսյան
