Քաղաքականություն
18.09.2026 | 18:19
ԱԺ «Հայաստան» խմբակցության ներկայացուցիչները Շվեդիայի, Նիդերլանդների և Բելգիայի դեսպանների հետ քննարկել են Հայաստանում խորհրդարանական ընտրություններից հետո տեղի ունեցող ներքաղաքական զարգացումները և արտաքին մարտահրավերները։ Ընդդիմադիր պատգամավորները դեսպաններին ներկայացրել են իրենց գնահատականները ժողովրդավարության, մարդու իրավունքների, օրենքի գերակայության և դատաիրավական համակարգում առկա խնդիրների վերաբերյալ։
ԱԺ-ի տարածած հաղորդագրությունը՝ ստորև․
«ԱԺ «Հայաստան» խմբակցության ղեկավար Աննա Գրիգորյանը, խմբակցության քարտուղար Արթուր Խաչատրյանն ու խմբակցության անդամ Լևոն Քոչարյանը սեպտեմբերի 18-ին հանդիպել են Հայաստանի Հանրապետությունում Շվեդիայի Թագավորության արտակարգ և լիազոր դեսպան Եվա Սունդքվիստի, Նիդերլանդների Թագավորության արտակարգ և լիազոր դեսպան Մարիկե Հարիետ Մոնրոյ-Վինթերի և Բելգիայի Թագավորության արտակարգ և լիազոր դեսպան Էրիկ դե Մույնքի հետ։
Ողջունելով հյուրերին խորհրդարանում՝ խմբակցության անդամները խոսել են Հայաստանում կայացած խորհրդարանական ընտրություններից հետո տեղի ունեցող ներքաղաքական զարգացումների մասին, անդրադարձել արտաքին մարտահրավերներին։
Խորհրդարանականները ներկայացրել են, իրենց կարծիքով, Հայաստանում ժողովրդավարության հետընթացին առնչվող դեպքեր, բարձրաձայնել, իրենց դիտարկմամբ, մարդու իրավունքների պաշտպանության և օրենքի գերակայության հարցերում արձանագրված որոշ խախտումներ։
Հյուրերի ուշադրությունն է հրավիրվել դատաիրավական համակարգում առկա խնդիրներին»:
