Առաջին անգամ ՆԱՏՕ-ի կործանիչները Լիտվայի օդային տարածքում ԱԹՍ են խոցել

Լիտվայի օդային տարածքում սեպտեմբերի լույս 15-ի գիշերն անօդաչու թռչող սարք է խոցվել։ Այս մասին հայտնել է Լիտվայի զինված ուժերի մամուլի ծառայությունը, փոխանցում է Current time-ը։

ԱԹՍ-ն խոցել են տեղական ժամանակով 00:20-ին, ՆԱՏՕ-ի դաշնակից երկրի՝ Իտալիայի կործանիչները, որոնք օդ են բարձրացել Շյաուլյայի ավիաբազայից։ ԱԹՍ-ի բեկորներն արդեն հայտնաբերվել են։ Հաղորդվում է, որ դեպքի վայրն առանձնացվել է, այնտեղ պահպանություն է սահմանվել, իսկ տարածքում աշխատում են զինվորականներ և ոստիկաններ։

«Մենք չենք շտապի եզրակացություններ անել, կանցկացվի հետաքննություն և կգնահատվեն բոլոր հանգամանքները։ Բանն այն է, որ նման միջադեպերը չեն նվազելու։ Այս պահին ամենակարևորն այն է, որ սպառնալիքը չեզոքացվել է և այլևս վտանգ չի ներկայացնում բնակչության համար։ Մենք շնորհակալություն ենք հայտնում դաշնակիցներին օպերատիվ արձագանքի և դիպուկ խոցման համար»,- ասվում է Լիտվայի զինվորականների հայտարարության մեջ։

Սա Լիտվայի օդային տարածքում ՆԱՏՕ-ի ավիացիայի կողմից խոցված առաջին անօդաչու թռչող սարքն է։ Դրա պատկանելությունը դեռևս չի պարզվել։

Delfi-ն, հղում անելով Լիտվայի Ճգնաժամերի կառավարման ազգային կենտրոնին, հայտնում է, որ անօդաչու թռչող սարքը կարող էր մուտք գործել Բելառուսի տարածքից։ Նախնական տվյալներով՝ այն խոցվել է Կայշյադորիսի շրջանի Պրատկունայ գյուղի մոտակայքում։

Լիտվայի նախագահ Գիտանաս Նաուսեդան հայտարարել է, որ «Ռուսաստանի՝ Ուկրաինայի դեմ ագրեսիայի սրման պայմաններում նման պատրաստվածությունը կենսական նշանակություն ունի տարածաշրջանի համար»։ Նրա խոսքով՝ Լիտվան ՆԱՏՕ-ի դաշնակիցների հետ միասին պաշտպանելու է իր օդային տարածքը։

Նշվում է նաև, որ հայտարարված օդային սպառնալիքի պատճառով Լիտվայում հետաձգվել են մի քանի չվերթներ։

Առաջին դեպքը չէ, երբ անօդաչու թռչող սարքերը մտնում են Բալթյան երկրների տարածք։ Մայիսի 19-ին ուկրաինական անօդաչուն առաջին անգամ խոցվել էր Էստոնիայի տարածքում։ Ուկրաինական կողմը նշել էր, որ իր ԱԹՍ-ները Բալթյան տարածաշրջան են մուտք գործում ռուսական ռադիոէլեկտրոնային պայքարի համակարգերի գործողությունների հետևանքով։ Լիտվայի և Էստոնիայի արտաքին գործերի նախարարները նույնպես Ռուսաստանին են մեղադրել ուկրաինական անօդաչու թռչող սարքերը միտումնավոր վերաուղղորդելու մեջ։

Թարգմանությունը՝ Էմմա Չոբանյանի