Ռուսական զորքերը հարվածել են Կիևում ինը հարկանի շենքի․ ութ մարդ է տուժել

Ռուսական զորքերը սեպտեմբերի լույս 11-ի գիշերը հարվածներ են հասցրել Ուկրաինային S8000 «Բանդերոլ» հրթիռ-դրոններով և 161 հարվածային անօդաչու թռչող սարքերով։ Ուկրաինայի ԶՈւ ռազմաօդային ուժերի հաղորդմամբ՝ 138 անօդաչու սարք խոցվել է, գրում է Current time-ը։

Կիևի մարզում հարվածի տակ են հայտնվել պահեստային տարածքներ։ Ուկրաինայի Արտակարգ իրավիճակների պետական ծառայությունից հայտնել են, որ հարձակման հետևանքով Բուչայի շրջանում հրդեհ է բռնկվել։

«Հրդեհը մարելու ընթացքում թշնամին կրկնակի հարված է հասցրել։ Չնայած վտանգին՝ փրկարարները շարունակել են աշխատանքը։ Ներկայում հրդեհը տեղայնացվել է, կրակի տարածում չկա։ Հետևանքների վերացման աշխատանքները շարունակվում են»,- ասվում է գերատեսչության հաղորդագրության մեջ։

Զապորոժիեի մարզում գիշերը զանգվածային հարձակման է ենթարվել Զապորոժիեն, հայտնել է Ուկրաինայի Արտակարգ իրավիճակների պետական ծառայությունը։ Վիրավորվել են 32-ամյա կին և նրա 10-ամյա որդին։ Գերատեսչության տվյալներով՝ հարվածի հետևանքով վնասվել է իննահարկ բնակելի շենքի տանիքը, որտեղ հրդեհ է բռնկվել։ Բացի այդ՝ հրդեհներ են առաջացել առևտրի կենտրոնում և գրասենյակային տարածքում։ Նշվում է, որ հետևանքների վերացման աշխատանքները բարդացել են կրկնակի հարվածների մշտական սպառնալիքի պատճառով, ինչի հետևանքով հրշեջները ստիպված են եղել պարբերաբար դադարեցնել աշխատանքը և թաքնվել։

Դնեպրոպետրովսկի մարզի Դնեպր քաղաքում, ըստ մարզային վարչակազմի ղեկավար Ալեքսանդր Գանժայի, բեռնատարներ են հրդեհվել մասնավոր ձեռնարկության տարածքում, որի հետևանքով վիրավորվել է երկու մարդ: Նիկոպոլի շրջանում վնասվել են մասնավոր տներ և մեկ մեքենա, վիրավորվել է մեկ մարդ:

ՌԴ Պաշտպանության նախարարությունից հայտնել են, որ Կիևում և Կիևի մարզում հարված է հասցվել «Բի-մոբայլ» տվյալների կենտրոնին և «Գոստոմել» լոգիստիկ կենտրոնին, Խմելնիցկիի մարզում՝ «Նովա պոչտա» ընկերության տերմինալին, Դնեպրոպետրովսկի մարզում՝ «Դնեպր» լոգիստիկ կենտրոնին։ Օդեսայի մարզում, ըստ ՌԴ ՊՆ-ի, հարվածներ են հասցվել ավտոմոբիլային ագրեգատների գործարանին և անօդաչու թռչող սարքերի բաղադրիչների պահեստին։ Չեռնոմորսկի նավահանգստում վնասվել է երկու բեռնատար նավ, ևս մեկ բեռնատար նավ էլ՝ Օդեսայի նավահանգստում։

Թարգմանությունը՝ Էմմա Չոբանյանի