ՊԵԿ-ը օգոստոսին արձանագրել է հարկային իրավախախտումների մի շարք դեպքեր

Պետական եկամուտների կոմիտեն ամփոփել է օգոստոսի 1-31-ն ընկած ժամանակահատվածում հարկային իրավախախտումների կանխման, խափանման և բացահայտման ուղղությամբ իրականացված օպերատիվ-հետախուզական միջոցառումների արդյունքները։

ՊԵԿ-ի փոխանցմամբ՝ 24 դեպքով արձանագրվել է առանց համապատասխան հաշվարկային փաստաթղթեր դուրս գրելու՝ ընդհանուր 3 մլն դրամի ապրանքների տեղափոխում կամ մատակարարում՝ ՀՀ հարկային օրենսգրքի պահանջների խախտմամբ։ Հնարավոր տուգանքի գումարը կազմում է 62.5 մլն դրամ։

17 դեպքով կազմվել են ապօրինի գործունեությամբ զբաղվելու վերաբերյալ արձանագրություններ։ Ապօրինի ձեռնարկատիրական եկամուտը կազմել է 242.5 մլն դրամ, իսկ հնարավոր տուգանքի գումարը՝ 126.1 մլն դրամ։

14 դեպքով արձանագրվել են լիցենզավորման կամ ծանուցման ենթակա գործունեությունն առանց լիցենզիայի կամ ծանուցման իրականացնելու, ինչպես նաև առանց թույլտվության կամ լիցենզիայի ընդերքը կամ բնական պաշարներն օգտագործելու խախտումներ։ Արձանագրված խախտումների գումարը կազմել է 27 մլն դրամ։

Ստվերային շրջանառության բացահայտման ուղղությամբ իրականացված միջոցառումների արդյունքում 35 հարկ վճարող ներկայացրել է ԱԱՀ-ի, շրջանառության հարկի, եկամտային հարկի և ակցիզային հարկի ճշգրտված հաշվարկներ։ Դրանցով իրացման շրջանառությունը բարձրացվել է 1.5 մլրդ դրամով, ինչի արդյունքում հաշվարկվել է բյուջե վճարման ենթակա 249.2 մլն դրամ հարկ։

ԵԱՏՄ տարածքից ներմուծված ապրանքների ինվոյսներում գների արժանահավատությունը ճշտելու ուղղությամբ կատարված աշխատանքների արդյունքում 646 դեպքով ներկայացվել են ճշտված հայտարարագրեր։ Դրանցով ինվոյսային արժեքը բարձրացվել է 931.4 մլն դրամով, և հաշվարկվել է բյուջե վճարման ենթակա 186.2 մլն դրամ հարկ։

Շահութահարկի թաքցված հարկվող օբյեկտների բացահայտման ուղղությամբ իրականացված աշխատանքների արդյունքում 5 դեպքով ներկայացվել են շահութահարկի ճշգրտված հաշվարկներ։ Դրանցից 3 դեպքով հարկվող շահույթը բարձրացվել է 281.7 մլն դրամով, ինչի արդյունքում հաշվարկվել է 55.4 մլն դրամ շահութահարկ։ Եվս 2 դեպքով ծախսերը նվազեցվել են 54.6 մլն դրամով, ինչի արդյունքում հաշվարկվել է բյուջե վճարման ենթակա 4 մլն դրամ շահութահարկ։

ՊԵԿ-ը հարկ վճարողներին հորդորել է գործել օրենքի շրջանակում և հետևել օրենսդրության պահանջներին։