ՌԴ-ն ու Թուրքիան քննարկել են Հարավային Կովկասում իրավիճակը

Մոսկվայում սեպտեմբերի 8-9-ը կայացել է Ռուսաստանի և Թուրքիայի արտաքին գործերի նախարարությունների միջև միջգերատեսչական խորհրդակցությունների հերթական փուլը։

ՌԴ ԱԳՆ-ի հաղորդմամբ՝՝ Թուրքիայի ԱԳՆ Արևելյան Եվրոպայի և Անդրկովկասի վարչության տնօրեն Մուստաֆա Սամսարին ընդունել է Ռուսաստանի արտաքին գործերի նախարարի տեղակալ Միխայիլ Գալուզինը։ Սամսարը նաև խորհրդակցություններ է անցկացրել ՌԴ ԱԳՆ ԱՊՀ երկրների երրորդ և չորրորդ դեպարտամենտների ղեկավարության հետ։

Բանակցությունների ընթացքում քննարկվել են Հարավային Կովկասում տիրող իրավիճակը, Կենտրոնական Ասիայում համագործակցությունը և Ուկրաինայի շուրջ զարգացումները։

«Ընդգծվել է արտաքին ուժերի կողմից այնպիսի նախաձեռնությունների ներմուծման անթույլատրելիությունը, որոնք Կենտրոնական Ասիայում և Հարավային Կովկասում նոր բաժանարար գծեր կստեղծեին։ Այս համատեքստում կողմերն ընդգծել են «3+3» տարածաշրջանային համագործակցության հարթակի (Ադրբեջան, Հայաստան, Վրաստան՝ գումարած Ռուսաստան, Իրան և Թուրքիա) աշխատանքը կանոնավոր կերպով շարունակելու շահագրգռվածությունը՝ որպես «տարածաշրջանային պատասխանատվության» սկզբունքի հիման վրա կայունության և անվտանգության ամրապնդման հեռանկարային մեխանիզմ»,- ասվում է հայտարարության մեջ։

Նշվում է, որ թուրքական կողմի ուշադրությունը հրավիրվել է ուկրաինական ճգնաժամի կարգավորմանն ուղղված Մոսկվայի սկզբունքային մոտեցումներին, որոնք նախատեսում են վերացնել հակամարտության արմատական պատճառները։

Կողմերը քննարկել են նաև Սև ծովում Կիևի, ըստ Մոսկվայի, ապակառուցողական գործողությունները, որոնք վտանգում են նավագնացության անվտանգությունը, այդ թվում՝ Թուրքիայի համար։

Թարգմանությունը՝ Էմմա Չոբանյանի