«Հովանավորել են ծառահատումները»․ հայտնի է՝ ինչու է Հակակոռուպցիոնը մտել էկոպարեկային ծառայություն

Կաշառք տալու և ստանալու դեպքերի առթիվ ՀՀ հակակոռուպցիոն կոմիտեում նախաձեռնված քրեական վարույթի շրջանակում ձերբակալվել են 8 անձինք, այդ թվում՝ Մեղրի համայնքի ղեկավարը և Էկոպարեկային ծառայության Սյունիքի մարզային ստորաբաժանման ղեկավարը: Այս մասին հայտնում է Հակակոռուպցիոն կոմիտեն:

Factor.am-ի տեղեկություններով` ստորաբաժանման ղեկավար Սասուն Մանուկյանը նախկինում զբաղեցրել է «Հայանտառ» ՊՈԱԿ-ի Սյունիքի մասնաճյուղի տնօրենի պաշտոնը: Նա Էկոպարեկային ծառայության ղեկավար Վլադիմիր Կիրակոսյանի մտերիմն է:
Ըստ մեր աղբյուրի` Մանուկյանն ու մյուս աշխատակիցները չեն արձանագրել ապօրինի ծառահատման դեպքերը և հովանավորել են դրանք: Մեր տեղեկություններով` վարույթը վերաբերում է կաշառք տալու և ստանալու դեպքերին:

Հիշեցնենք, որ օգոստոսի 4-ին էլ Հակակոռուպցիոն կոմիտեի աշխատակիցները ձերբակալել էին Սևանի տեղամասի պետ Պողոս Մարտիրոսյանին, հերթափոխի ավագ Արտուշ Համբարձումյանին, ինչպես նաև՝ ՆԳՆ Պարեկային ծառայության ջրային պարեկների վաշտի հրամանատար Դավիթ Գալոյանին։

Factor.am-ի աղբյուրի փոխանցմամբ` ձերբակալված պաշտոնատար անձինք, նախնական համաձայնության գալով մի խումբ անձանց հետ, ուղղորդել են ձկնորսներին, որպեսզի վերջիններս կազմակերպեն Կարմիր գրքում գրանցված Սևանի իշխանի ապօրինի որս։ Հակակոռուպցիոն կոմիտեն հայտնել էր, որ քրեական վարույթը վերաբերում է կաշառք տալու և կաշառք ստանալու դեպքերին։ Թեև գերատեսչությունը չէր հրապարակել ձերբակալվածների անունները, սակայն տեղեկացրել էր, որ վարույթի շրջանակում ձերբակալվել է 4 անձ։

Ձերբակալվածների նկատմամբ ընտրվել են խափանման միջոցներ. ՆԳՆ Պարեկային ծառայության ջրային պարեկների վաշտի հրամանատար Դավիթ Գալոյանի նկատմամբ որպես խափանման միջոց կիրառվել է կալանքը, Շրջակա միջավայրի նախարարության Էկոպարեկային ծառայության Սևանի տեղամասի պետ Պողոս Մարտիրոսյանի նկատմամբ՝ վարչական հսկողությունն ու պաշտոնավարման կասեցումը, իսկ մյուս երկու ձերբակալվածների նկատմամբ ընտրվել են այլընտրանքային խափանման միջոցներ։

Արփի Հակոբյան